Ադրբեջանի պաշտպանության նախարարությունը հանդես է եկել հայտարարությամբ՝ սադրանք որակելով Հայաստանի պաշտպանության նախարար Արշակ Կարապետյանի այցը Արցախ:
«Հայկական լրատվամիջոցները տեղեկություն են տարածել, որ Հայաստանի պաշտպանության նախարար Արշակ Կարապետյանն անօրինական կերպով այցելել է Ադրբեջանի տարածք, որտեղ ժամանակավորապես տեղակայված են ռուս խաղաղապահներ:
Հայաստանի պաշտպանության նախարարի չարտոնված այցը Ադրբեջանի տարածք, հանդիպումները հայկական անօրինական խմբավորումների հետ և նրա արտահայտությունները նրանց մարտունակության մասին ռազմաքաղաքական սադրանք են:
Հայաստանի պաշտպանության նախարարի այդ սադրիչ այցը դիտավորյալ կատարվել է 2020թ. նոյեմբերի 10-ին Ադրբեջանի և Ռուսաստանի նախագահների և Հայաստանի վարչապետի կողմից ստորագրված եռակողմ հայտարարության մեկամյակի նախօրեին»,- ասվում է հայտարարության մեջ:
Կարդացեք նաև
Ադրբեջանի ՊՆ-ն հայտարարել է, որ այդպիսի գործողություններով Հայաստանի ռազմաքաղաքական ղեկավարությունը կոպտորեն խախտում է եռակողմ հայտարարության դրույթները, գիտակցաբար փորձում սրել իրավիճակը տարածաշրջանում և սևացնել ռուս խաղաղապահների գործունեությունը:
«Ղարաբաղյան 44-օրյա երկրորդ պատերազմի լիակատար պարտությունից հետևություններ կատարելու, տարածաշրջանում նոր աշխարհաքաղաքական իրավիճակին հարմարվելու և խաղաղությունն ու անվտանգությունն ամրապնդելու փոխարեն՝ Հայաստանի ռազմական ղեկավարությունը փորձում է իրականացնել էժանագին ռազմական արկածախնդրություն՝ ներքին սպառման համար»,- ասվում է հաղորդագրության մեջ:
Ըստ Ադրբեջանի՝ այդ այցը ևս մեկ անգամ ցույց է տալիս, որ Հայաստանը շարունակում է «ուղղակիորեն աջակցել Ադրբեջանի տարածքում հայկական անօրինական խմբավորումներին, ագրեսիվ անջատողականությանը, ահաբեկչական և սադրիչ գործողություններին:
«Միաժամանակ, Հայաստանի զինված ուժերի շարունակում են մնալ Ադրբեջանի տարածքում, որտեղ ժամանակավորապես տեղակայված են ռուս խաղաղապահներ,- ասվում է հայտարարության մեջ:- Ցանկանում ենք հիշեցնել Հայաստանի պաշտպանության նախարարին իր նախկին գործընկերների և այլ հայ գեներալների ճակատագրի մասին, որոնք առաջ էին քաշում ուտոպիստական հայտարարություններ, ինչպիսիք են «Օհանյանի անհաղթահարելի գիծը», «նոր պատերազմներ, նոր տարածքներ»:
Ադրբեջանի ՊՆ-ն զգուշացրել է Հայաստանի ռազմաքաղաքական ղեկավարությանը, որ նման «անօրինական այցերի» շարունակության դեպքում անհրաժեշտ քայլեր կձեռնարկվեն «ագրեսիվ անջատողականության և ահաբեկչական գործողությունների կանխարգելման համար՝ համաձայն Ադրբեջանի օրենսդրության»:
Պատրաստեց Վիկտորյա ԱՆԴՐԵԱՍՅԱՆԸ
