«Որքան շատ ենք խոսում խաղաղությունից եւ խաղաղասիրությունից, այդքան շատ ենք պատասխան ագրեսիա ստանում։ Չեմ հիշում դեպք, որ մեր մեկնած խաղաղության ձեռքն ադեկվատ ընդունվի։ Փաստենք, որ խաղաղապահների առկայության պայմաններում, նրանց ներկայությամբ հայ երիտասարդ է սպանվում, մյուսներն էլ վիրավորվում են»,- խորհրդարանում այսօր լրագրողների հետ ճեպազրույցում անդրադառնալով «Շուշիի տակ» կոչվող հատվածում ադրբեջանցի զինծառայողի կողմից մեկ հայի սպանության եւ երեքի վիրավորման դեպքին՝ ասաց «Պատիվ ունեմ» խմբակցության պատգամավոր, ԱԺ մարդու իրավունքների պաշտպանության եւ հանրային հարցերի հանձնաժողովի նախագահ Թագուհի Թովմասյանը։
Նրա խոսքով՝ քաղաքակիրթ մարդկությունը լուռ նայում է, թե ինչպես է Ադրբեջանը հրավառությամբ տոնում իր մարդասպանության եւ մեր հայրենազրկման մեկ տարին․ «Մենք մենակ ենք մնացել։ Քաղաքակիրթ մարդկությունը պետք է դատապարտի Ադրբեջանի ցանկացած նման գործողություն։ Առաջինը ՀՀ-ն պետք է դատապարտի։ Եթե մենք չենք անում, էլ ի՞նչ ենք ուզում աշխարհից։ Խաղաղապահները կանգնած են, բայց Ադրբեջանը հայ է սպանում, ընդ որում՝ քաղաքացիական անձի, որը գործ էր անում։ Ի՞նչ է անում ռուսական կողմը։ Սա ապտակ է նաեւ ռուսական կողմին։ Մենք պետք է պահանջատեր լինենք։ Ադրբեջանը նման գործողություններով հայերին մատաղ է անում իր հաղթանակին, ուստի աշխարհը պետք է արձագանքի»։
ԱԺ նախագահ Ալեն Սիմոնյանն այսօր դատապարտել էր նշյալ միջադեպը։ Թագուհի Թովմասյանը շեշտեց, որ դատապարտելը բավարար չէ․ «Այն ինքնաբուխ պետք է լինի, ոչ թե հարցուպատասխանի ձեւաչափով։ Դատապարտման տեքստերը պետք է ուղարկվեն միջազգային կառույցներին»։
Ինչ վերաբերում է ԱԺ նախագահի համոզմունքին, որ պատերազմի հարցերով ստեղծվելիք քննիչ հանձնաժողովը հրավիրյալների մեծ ցանկ է ունենալու, Թովմասյանը պնդեց, որ ենթադրյալ հանցագործը չի կարող իր հանցագործության մասին վարկած քննել․ «Նկատի ունեմ գործող իշխանությանը։ Հանձնաժողովը չի կարող օբյեկտիվ լինել։ Ներգրավվելու են մարդիկ, որոնք պատերազմի ժամանակ պաշտոններ են ունեցել։ Կանեն ամեն ինչ, որ մեղադրանք չհնչի, որ օբյեկտիվ քննություն չլինի։ Ընդդիմությունն ի սկզբանե պետք է հայտարարի, որ չի ընդունելու հանձնաժողովի արդյունքները»։
Կարդացեք նաև
Լրագրողները հետաքրքրվեցին՝ ադրբեջանցիների հետ խաղաղ գոյակցություն պատկերացնո՞ւմ եք։ Պատգամավորը պատասխանեց․ «Կդժվարանամ ասել, որ հնարավոր է։ Օրինակով պատասխանեմ։ Երբ փոքր էր, ԽՍՀՄ տարիներին Վարդենիսում ադրբեջանցիների հետ խաղաղ գոյակցություն էր։ Հորեղբայրս եւս շփվել, ընկերություն է արել ադրբեջանցու հետ։ Մի օր ադրբեջանցի ընկերը, որը հորեղբորս պարտք է եղել, նրան հրավիրել է գառ ուտելու։ Գնացել են սարերում գառ ուտելու, եւ վերջում նա հորեղբորս կացնահարել է։ Այսինքն, նրանք թիկունքից խփող, կացնահարող տեսակն են, սաֆարովներ ծնող տեսակն են, եւ այսօր էլ դպրոցից ատելություն են քարոզում հայերի հանդեպ։ Չեմ պատկերացնում խաղաղ գոյակցություն»։
Լուիզա ՍՈՒՔԻԱՍՅԱՆ
