Նիկոլ Փաշինյանի երեկվա հարցազրույցում, «Հայաստան» խմբակցության պատգամավոր, պաշտպանության նախկին նախարար Սեյրան Օհանյանը նկատել է, որ նա փորձում է մեղքերն ուղղել բոլորի ուղղությամբ, բայց ոչ իրենց: «Նկատեցի, որ մեղքերի մեծագույն բաժինը փորձում է ուղղել բանակի ուղղությամբ»,- խորհրդարանում լրագրողների հետ զրույցում ասաց Սեյրան Օհանյանը:
Սեյրան Օհանյանի պնդմամբ, մենք բանակ ունեցել ենք, այս իշխանություններն են, որ տարիներով ստեղծված բանակը տարբեր գործողություններով՝ քաղաքականացնելով, կառուցվածքային ոչ լիարժեք, արագ-արագ կադրային փոփոխություններով, իջեցրել են բանակի մարտունակության աստիճանը, հաղթանակած բանակը դարձրել են պարտված բանակ: «Եթե բանակն է մեղավոր, ինչո՞ւ համար էին մարտական գործողությունների տարբեր հատվածներում լիարժեք իր առջեւ դրված խնդիրներն իրականացրել, ինչո՞ւ պետության ղեկավարությունը չի կարողացել ճիշտ գնահատել ռազմաքաղաքական իրավիճակը եւ գլխավոր հարվածի ուղղությամբ վերախմբավորում կատարել, կանգնեցնել հակառակորդին: Ինչո՞ւ գլխավոր հարվածի մխրճման ուղղությամբ խրախուսվել են տվյալ ուղղության ղեկավարությունը: Ինչո՞ւ պետության ողջ ներուժը չէր դրվել ռազմական ռեյլսերի վրա: Սրանք հարցեր ենք, որոնց պետք է պատասխանի այսօրվա իշխանությունը»,- ասաց նախկին նախարարը՝ հավելելով, որ պատերազմի ժամանակ այս իշխանությունը կանոնավոր բանակը վերածեց ջոկատների:
«Բանակը երբեւիցե փակ չի եղել, միայն այն դեպքում, երբ գաղտնիություն է պարունակել՝ մարտական կիրառման պլաններ, գաղտնի գործողություններ։ Իրենք բանակի մոբիլիզացիոն ամբողջ պլանը պատերազմի ժամանակ վերածեցին ջոկատային գործողությունների»,- հավելեց Սեյրան Օհանյանը՝ պնդելով, որ նման պլան գոյություն ունեցել է, իսկ գործող իշխանությունը ձախողել է բանակաշինության գործը:
Նելլի ԳՐԻԳՈՐՅԱՆ
