«Այսօր Հայաստանում ունենք համաճարակային լարված իրավիճակ, իսկ դիմակների կրումը ցանկությամբ չէ, պարտադիր է։ Իսկ ով չի կրում, ի՞նչ կապ ունի պաշտոնյա, թե՞ ոչ պաշտոնյա, ով օրենքը խախտեց, պետք է տուգանվի»,-այսօր այս մասին Ազգային ժողովում լրագրողների հետ զրույցում հայտարարեց առողջապահության նախարար Անահիտ Ավանեսյանը՝ հավելելով, որ մահճակալային ֆոնդը գերլարված է, ազատ մահճակալներ չկան, իսկ դեղորայքային և մասնագետների ռեսուրսն ամբողջությամբ մոբիլիզացված է։
Նախարարի խոսքով՝ իրավիճակի միակ հանգուցալուծումը պատվաստումն է։ Նրա պնդմամբ՝ վիճակը կկայունանա, երբ ամբողջությամբ պատվաստված լինի բնակչության գոնե 70 տոկոսը։
Ի պատասխան լրագրողների՝ սանավիացիայի օգտագործման մասին հարցերի, Անահիտ Ավանեսյանը նշեց․ «Ես օգտվել եմ սանավիացիայից, Կովիդի հետ կապված շտապ այցելել եմ Սյունիք։ Օգտվելը համարել եմ նպատակահարմար, եթե հետագայում էլի անհրաժեշտություն լինի՝ էլի կօգտվեմ։ Այլ հարցերը ներկայացրեք գրավոր»։
Լրագրողները հետաքրքրվեցին նաև ՊՇՌ թեստերի գնի նվազեցմամբ, սակայն նախարարը հայտնեց, որ թեստի գինը որոշելը որևէ կերպ առողջապահության նախարարության լիազորությունը չէ։
Կարդացեք նաև
Անահիտ Ավանեսյանի փոխանցմամբ՝ Հայաստանը չունի ՊՇՌ թեստերի կամ որևէ պատվաստանյութի պակաս։ Միաժամանակ տեղեկացրեց, որ այս պահին ունենք 12 տարեկանից փոքր 50 երեխա, ովքեր պատվաստվել են ծնողների համաձայնությամբ։
«Առողջապահության ենթակայության ներքո գործող կովիդ սպասարկող հիվանդանոցների բժիշկների 90 տոկոսը պատվաստված է։ Հայտնեմ նաև, որ հղիների մեջ ունենք կովիդից մահացության դեպքեր, իսկ վարակվածության ցուցանիշը բարձր է։ Իհարկե, որոշ մարդիկ մեծ դեր խաղացին, վերցրին պատվաստանյութի թեման և վախեցրին հղիներին, բայց ես բոլոր հղիներին խնդրում եմ խորհրդակցել իրենց բուժող բժշկի հետ, իսկ ձեզ խնդրում եմ հարթակ չտրամադրել կասկածելի նպատակներով մարդկանց»,- ասաց նա։
Ամփոփելով իր խոսքը՝ նախարարը նշեց, որ տեղյակ չէ խորհրդարանում աշխատող պատվաստված անձանց թվից։
Նելլի ԳՐԻԳՈՐՅԱՆ
