Օրերս կայացավ բիթբոքսեր Հայկ Սնխչյանի՝ Shady-ի համերգը: Aravot.am-ի հետ զրույցում Հայկը նշեց, որ իրենց համար շատ կարեւոր էր գործընկերների հետ կազմակերպել հիփ հոփ երեկո ՝ բիթբոքսի շեշտադրմամբ: «Քանի որ բիթբոքսը համարվում է հիփ հոփ մշակույթի հինգերորդ էլեմենտը, Բիթբոքսի ասոցիացիայով որոշեցինք կազմակերպել հիփ հոփ երեկո, որը 2021-ի ընթացքում հինգերորդն էր: Մեր նպատակն է հիփ հոփը զարգացնելը Հայաստանում»,-հավելեց մեր զրուցակիցը:
«Շեյդին» ասում է, որ սպասելիքները համերգից եւ ունկնդրից արդարացված էին, թեեւ, իր տպավորությամբ, փոքրիկ բացթողումներ կային, որոնք համերգից համերգ շտկվում են: «Կարեւորը, որ ունկնդիրը համերգը շատ լավ ընդունեց, բազմաթիվ հյուրեր ունեինք՝ շուրջ երեք տասնյակ, եւ զբոսաշրջիկներ կային, ու ռուսաստանցի պատգամավոր ու նախարար»,-ասաց մեր զրուցակիցը:
«Շեյդին» նշեց, որ իրենից բացի ելույթ են ունեցել այլ բիթբոքսերներ եւս՝ Էրիկ Հմայակյանը (Rico), Սեւան Շահնազարյանը (Sevan), Հմայակ Բեթ-Սարգիսը (Genius) Վազգեն Դանիելյանը (Elvinadan), մասնակցել են ռեփ մշակույթի ներկայացուցիչներ Գյումրիից՝ ABO-ն, Kol-ը, ինչպես նաեւ այլ երաժիշտներ՝ Koa-ն, Karlos Saha-ն, NAY374-ը, Rebeka-ն, DBand-ը:
Կարդացեք նաև
Նրա համոզմամբ, երիտասարդությունը սկսել է ավելի շատ ճանաչել հայ բիթբոքսերներին, թեեւ ներկայումս բիթբոքս մշակույթն այդքան զարգացած չէ Հայաստանում, բայց փորձում են այնպես անել, որ տղաներն ավելի մեծ ճանաչում ձեռք բերեն:
«Ես եւ Սեւանը մի քանի ամիս է, ինչ զորացրվել ենք: Մենք փորձում ենք մեր բաց թողածը վերադարձնել, ու այդ առումով շատ հաճելի էր, որ ունկնդրի կողմից մեծ աջակցություն եղավ»,-ասաց «Շեյդին»: Նաեւ հավելեց, որ թեեւ համերգը շատ էներգիա էր խլել իրենցից, բայց անասելի զգացողություն են ունեցել ավարտից հետո եւ գերբավարավածություն ապրել: «Այսպիսի համերգներ էլի են լինելու, այնպես որ, խնդրում եմ հետեւել Հայաստանի բիթբոքսի ասոցիացիայի էջերին՝ նորություններին տեղեկանալու համար»,-ընդգծեց նա:
Հիշեցնենք, որ 20-ամյա բիթբոքսեր Հայկ Սնխչյանը` «Շեյդի» բեմական անունով, առաջին հայն է, որը իբրեւ Հայաստանի ներկայացուցիչ մասնակցել է Աշխարհի բիթբոքսի առաջնությանը եւ առաջինն է, որի հոլովակը տեղադրվել է համաշխարհային հեղինակություն վայելող, բիթբոքսի թեմային վերաբերող ամենամեծ Swissbeatbox կազմակերպության բոլոր սոցիալական էջերում:
Գոհար ՀԱԿՈԲՅԱՆ
Լուսանկարները Բիթբոքսի հայկական ասոցիացիայի ֆեյսբուքյան էջից:
