Ըստ ՀՀ առողջապահության նախարարության հրապարակած տեղեկության, «Տաշիր պիցցա» պիցցերիաների կետերից օգտված եւ «աղիքային վարակին» բնորոշ ախտանշաններով հոսպիտալացված քաղաքացիների թիվն այսօր առավոտյան ժամը 9:00-ի դրությամբ հասել էր 98-ի:
Կեսօրից հետո «Տաշիր պիցցա» ՍՊԸ մարքեթինգի բաժնի տնօրեն Արտակ Մաթեւոսյանը Aravot.am-ին ասաց. «Հուրախություն բոլորիս, պիտի հայտնեմ, որ հիվանդների 50 %-ը եւ ավելին արդեն հիվանդանոցներից դուրս են գրվել, մնացածների մոտ կա դրական դինամիկա: Սա նախնական ինֆորմացիան է, որ ձեզ փոխանցեցի: Օրվա մեջ եթե փոփոխություն եղավ, այդ մասին կարող եմ լրացուցիչ ձեզ տեղեկացնել»:
Մեր հարցին, թե պարզվե՞լ է, թե ինչից կամ որ սննդամթերքից է եղել մասսայական թունավորումը, պարոն Մաթեւոսյանը պատասխանեց. «Դեռ ոչ: Լաբորատոր հետազոտություն է անցկացվում: Գործընթացը գտնվում է Սննդի տեսչության եւ Առողջապահության նախարարության վերահսկողության ներքո: Մենք նրանց հետ ինտենսիվ կապի մեջ ենք: Լաբորատոր հետազոտության արդյունքներից պարզ կլինի, թե թունավորումն ինչից է եղել»:
Իսկ թե արդյունքները երբ հայտնի կլինեն, մեր զրուցակիցը հստակ ժամկետներ չկարողացավ նշել՝ վստահեցնելով, որ իրենք էլ են շահագրգռված պատասխանը շուտ իմանալու հարցով, որպեսզի հասկանան, թե ինչից էր խնդիրը:
Կարդացեք նաև
Աշոտ ՀԱԿՈԲՅԱՆ
