ԱԺ մշտական հանձնաժողովներում 2022թ․-ի պետբյուջեի նախնական քննարկումների ժամանակ այսօր որպես զեկուցող պետք է ներկայանար, այդ թվում՝ Երևանի քաղաքապետ Հայկ Մարությանը, սակայն եկել էր նրա տեղակալ Սերգեյ Ներսիսյանը։
«Քաղաքացիական պայմանագիր» խմբակցության պատգամավոր Սերգեյ Մովսիսյանը (լուսանկարում) հարցրեց՝ ինչո՞ւ Հայկ Մարությանը անձամբ չի ներկայացել, որ զեկուցի Երեւանի բյուջեի ծրագիրը: Քաղաքապետի տեղակալը պատասխանեց․ «Ճիշտն ասած՝ քաղաքապետն անձամբ էր ուզում գար ու ներկայացներ Երեւանի բյուջեն, բայց, ցավոք, համաճարակը նաեւ իրենց տուն մտավ։ Նրա երեխաներն ու կինը հիվանդ են քովիդով։ Նա, լինելով վտանգավոր «զոնայում», չի ուզում վտանգել այլ մարդկանց կյանքը: Նա աշխատանքի վայրում մեկուսացած վիճակում է, այսինքն, որեւէ մեկի հետ չի շփվում»։
Սերգեյ Մովսիսյանը փոխքաղաքապետին հորդորեց հետեւյալը փոխանցել․ «Առողջություն ենք մաղթում, իհարկե, ուղղակի փոխանցեք՝ պատգամավորներն ասում են, որ այս անգամ պատճառը հարգելի է, բայց մյուս անգամ անձամբ ներկայանա ԱԺ»:
Սերգեյ Ներսիսյանը պատասխանեց․ «Հաշվի կառնենք ձեր նկատառումը»։
Կարդացեք նաև
Լուիզա ՍՈՒՔԻԱՍՅԱՆ
