Մարդու իրավունքների եվրոպական դատարանում (ՄԻԵԴ) Հայաստանի ներկայացուցիչ, Սահմանադրական բարեփոխումների նախկին հանձնաժողովի նախագահ Եղիշե Կիրակոսյանի համոզմամբ՝ սահմանադրական բարեփոխումների նոր խորհրդի կազմում մասնագիտական և քաղաքական բաղադրիչների տարանջատումը ճիշտ քայլ է, և ընդհանրապես նման կառուցվածքը նաև հնարավորություն կտա խուսափել շատ դեպքերում, այսպես ասած, անելանելի իրավիճակներից:
ՀՀ արդարադատության նախարարության սահմանադրական բարեփոխումների նոր խորհրդի և մասնագիտական հանձնաժողովի ձևավորման գործընթացին նվիրված քննարկման ժամանակ Եղիշե Կիրակոսյանը փաստեց՝ սահմանադրական բարեփոխումների գործընթացը բավականին բազմաշերտ ու բարդ գործընթաց է: Իր փորձից ելնելով՝ նշեց, որ նախկինում էլ հանձնաժողովի ներսում բավականին բարդ քննարկումներ էին տեղի ունենում:
Նա ցավով նշեց, որ սահմանադրական բարեփոխումների նախկին հանձնաժողովի աշխատանքները պատերազմական գործողությունների պատճառով ընդհատվեցին:
ՀՀ արդարադատության նախարար Կարեն Անդրեասյանի համոզմամբ՝ Սահմանադրությունը պետք է «գրվի» ժողովրդի հետ միասին՝ հանրային այնպիսի լայն քննարկումներով, որ մարդիկ ոչ թե զուտ քվեարկեն, ոչ թե սահմանադրական հանրաքվեն կեղծվի, այլ պետք է ունենալ Սահմանադրության այնպիսի տեքստ, որ այն ազնվորեն քվեարկվի ժողովրդի կողմից:
Կարդացեք նաև
ՀՀ վարչապետի օգնական Աննա Վարդապետյանի համար ևս ընդունելի է սահմանադրական բարեփոխումների խորհրդի կառուցվածքը: Այս առիթով ասաց. «Փոքր մասնագիտական խումբը պրոֆեսիոնալ մաղի միջոցով կֆիլտրի այն քաղաքական որոշումները, որոնք կկայացվեն ավելի մեծ սեղանի շուրջ՝ կոնսենսունսներին տալով իրավական ճիշտ և ընդունելի ձևակերպում»:
Ըստ նրա՝ կարևոր է նաև քաղաքական և մասնագիտական տարանջատումը խորհրդի ներսում, որի հիմքում դրված է ներառական մասնակցային տեքստի մշակումը:
Տաթև ՀԱՐՈՒԹՅՈՒՆՅԱՆ
