«Ամուլսարի վերաբերյալ մեր վերջին գնահատականներից այս կողմ որեւէ տեղաշարժ չեմ ամրագրել։ Իմ լիազորությունների շրջանակում այս պահին անելու, միջամտելու, ներազդելու մանդատ չունեմ, քանի դեռ քրեական գործը չի հանգուցալուծվել եւ չի վերհանվել դրական կամ բացասական իրականությունը»,-խորհրդարանում լրագրողների հետ ճեպազրույցում այսօր անդրադառնալով Ամուլսարի հնարավոր շահագործման հարցին՝ ասաց ՀՀ շրջակա միջավայրի նախարար Ռոմանոս Պետրոսյանը։
Նրա խոսքով․ «Եթե գործընթացն այս պահին գտնվում է քրեաիրավական դաշտում, եւ ժամանակին տեղի ունեցած գործընթացները գտնվում են վարույթում, ապա այս պահին չեմ կարող գնահատել՝ կշահագործվի՞, թե ոչ։ Եթե քրեական գործի հանգուցալուծման արդյունքում վեր հանվի այնպիսի օբյեկտիվ իրականություն, որը կարող է ընդերքօգտագործման իրավունքի, ՇՄԱԳ փորձաքննության իրականացման վրա ազդել, բնականաբար, մենք մեր գործիքակազմով կազդենք։ Իսկ եթե ոչ, ապա տնտեսվարողն ունի հանքավայրը շահագործելու բոլոր լիցենզիաները։ Եթե տնտեսվարողն ուզի շահագործել հանքը, այս պահին նա տիրապետում է բոլոր լիցենզիաներին, ընդերքօգտագործման իրավունքին։ Վերջին շրջանում տվյալ տնտեսվարողին մենք ջրօգտագործման հայտ ենք մերժել, որովհետեւ տվյալ տարածաշրջանի ջրավազանային կառավարման պլանով ռեզերվ չկար՝ իրենց ջրօգտագործման թույլտվությունը բավարարելու։ Բայց այն թույլտվությունը, որը նրանք ունեն հիմա փոքր ծավալով, թույլ է տալիս գործընթացը մեկնարկել»։
Լուիզա ՍՈՒՔԻԱՍՅԱՆ
