Նոյեմբերի 4-ին տեղի ունեցավ «Մեր բակը․ 25 տարի անց» կինոնկարի առաջնախաղը, որը նկարահանվել է «Շարմ» հոլդինգի նախաձեռնությամբ։ Կինոնկարն արդեն մեծ էկրաններին է ու պատմում է «Մեր բակ»-ի նույն հերոսների մասին։ «Մեր բակ»-ը ներկայացվել է յուրովի՝ շնորհիվ ռեժիսոր Արշո Հարությունյանի։ Աշոտ Աբրահամյանի, Սարգիս Մնոյանի եւ Ռուբեն Ջաղինյանի սցենարով՝ ռեժիսորը բակի հերոսներին դուրս է հանել հայտնի տարածքից, թեեւ «Մեր բակը»-ի ու առանցքային տաղավարի մասին չեն մոռացել։
Հերոսների սիրելի բակը նույնն է, բնակիչները շատացել են, փոխվել, սակայն բակի հնաբնակները ապրում են բակում՝ Աշոտ Ղազարյանը, Լալա Մնացականյանը եւ Հրանտ Թոխատյանը, որոնք համախմբվել են մի գաղափարի շուրջ, որի իրագործման համար անցնում են բազում խենթ ու խելառ պատմությունների միջով։
Կարդացեք նաև
«Շատ ուրախ եմ, որ ես էլ դարձա «Մեր բակը»-ի ընտանիքի անդամ: Սկզբում կարծում էի՝ ամենահուզիչ ու պատասխանատուն այն պահն էր, երբ ես առաջարկություն ստացա ֆիլմը նկարահանելու: Հետո ինձ թվաց, որ ամենահուզիչ ու պատասխանատու պահն այն էր, երբ ես նկարահանումների մեջ էի, իսկ այժմ հասկանում եմ, որ ամենապատասխանատու պահը հիմա է, երբ հազարավոր մարդիկ բոլոր կինոթատրոններում դիտելու են մեր նոր աշխատանքը: Մենք մեր բոլոր հույզերը, ամբողջ գիտակցությունը, էներգիան ներդրել ենք ֆիլմում, որպեսզի դուք ապրեք նոստալգիկ տրամադրություններ, տեսնեք ու վայելեք տաղանդավոր դերասանների խաղը»,- ոգեւորությամբ նշեց ֆիլմի ռեժիսոր Արշո Հարությունյանը:
Նատալի ՄԿՐՏՉՅԱՆ
