ԿԳՄՍ նախարար Վահրամ Դումանյանն այսօր կառավարության նիստից հետո լրագրողների հարցերին ի պատասխան ասաց՝ հավատարիմ են մնացել քաղաքական որոշմանը, որ բուհերի հոգաբարձուների խորհրդում չպետք է լինեն պաշտոնյաներ:
Նա հիշեցրեց, որ Սահմանադրական դատարանը հակասահմանադրական է ճանաչել «Բարձրագույն կրթության եւ գիտության մասին» օրենքի որոշ դրույթներ:
Վահրամ Դումանյանն անդրադարձավ նաեւ այն հարցին, որ բուհերի հոգաբարձուների խորհուրդներում շարունակում են պաշտոնյաներ ներգրավվել՝ չնայած, որ խոսում են բուհերի ապաքաղաքական լինելու մասին:
ԿԳՄՍ նախարարն ասաց մի քանի բուհերի՝ մասնավորապես՝ ՀՄՊՀ, ԵՊՀ, ԵՊԲՀ հոգաբարձուների խորհուրդներում կան փոխնախարարներ եւ այլ պաշտոնյաներ. «Մենք ներկայացրել էինք «Բարձրագույն կրթության եւ գիտության մասին» օրենքը, որի որոշ դրույթներ Սահմանադրական դատարանը ճանաչել է հակասահմանադրական: Հիմա շրջանառում ենք օրենքի նոր տարբերակ, մնում ենք նույն սկզբունքին, որ չպետք է լինեն քաղաքական դեմքեր: Այսօրվա գործող օրենքների շրջանակում է կատարվել ամեն ինչ»:
Կարդացեք նաև
Հարցին էլ՝ ինչո՞ւ են փոխվարչապետ Սուրեն Պապիկյանը, Նիկոլ Փաշինյանի օգնական Նաիրի Սարգսյանը դարձել ԵՊՀ հոգաբարձուների խորհրդի անդամներ, Վահրամ Դումանյանը պատասխանեց՝ այդպես են հարմար գտել: Իսկ թե Սուրեն Պապիկյանն ի՞նչ կարող է անել ԵՊՀ-ում, կրթության, գիտության ոլորտում, նախարարն ասաց՝ կապրենք, կտեսնենք:
Լուսինե ԲՈՒԴԱՂՅԱՆ
