ՀՀ արդարադատության նախարարությունը փակում է «Կոշ» եւ «Հրազդան» ՔԿՀ-ները, եւ առաջիկայում 2 կամ 3 ՔԿՀ-ներ կմիավորվեն։ Այս մասին ԱԺ պետաիրավական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում այսօր 2022թ․-ի պետբյուջեի նախագծի քննարկման ժամանակ հայտարարեց արդարադատության նախարար Կարեն Անդրեասյանը։
Նա չցանկացավ բացահայտել, թե կոնկրետ որ ՔԿՀ-ներն են միավորելու, որպեսզի աշխատակիցների շրջանում անհանգստություն չլինի, սակայն վստահեցրեց, որ նրանց անգործ թողնելու նպատակ չունեն։
Նախարարի խոսքով՝ նոր ՔԿՀ է լինելու․ «Վստահ չեմ, որ շինարարությունը կսկսվի 2022թ․-ին, բայց հստակ է, որ բացարձակ նոր ՔԿՀ կունենանք «Էրեբունի» ՔԿՀ-ի նախկին տարածքում։ Այն լինելու է մոդելային՝ նոր, վերապատրաստված մասնագետներով եւ կարգավորումներով, ինչպես ոստիկանության պարեկային ծառայությունն է։ Այդ ՔԿՀ-ում գտնվելն ինչ-որ իմաստով կլինի օրհնություն, որովհետեւ մարդու իրավունքների համար պաշտպանված պայմաններ կլինեն։ Բայց որոշների համար էլ այն կարող է լինել ցավալի, որովհետեւ չեն կարողանա ՔԿՀ-ի կանոններն ու օրենքները խախտել։ Նոր ՔԿՀ-ն դառնալու է շատ խիստ, ներքին կարգապահական կանոններով օրինակ»։
Նախարարը նաեւ ցավով հայտնեց, որ այսօր ՔԿՀ-ներից մեկում կորոնավիրուսից մահվան առաջին դեպքն է գրանցվել․ «Ճշտումներ են արվում առողջականի վերաբերյալ, բայց ինձ նախնական այդպես են զեկուցել։ Քննարկում ենք, թե ինչպես ժամանակավոր սահմանափակենք շարժը, որ ապահովենք հակահամաճարակային իրավիճակը»։
Կարդացեք նաև
Լուիզա ՍՈՒՔԻԱՍՅԱՆ
