«Ապրանքախմբերի մեծ մասում մեր դիտարկումներով դրամի փոխարժեքը գնաճի վրա մեծ ազդեցություն չի ունենում, բայց փոխարժեքը որոշակիորեն կապված է ներմուծման եւ բեռնափոխադրումների խաթարումների հետ»,- այսօր Կենտրոնական բանկում կազմակերպված ասուլիսում ասաց ԿԲ նախագահ Մարտին Գալստյանը: Նրա խոսքով, դրամի ազատ լողացող փոխարժեք ունենք եւ, այս պահի դրությամբ, այն մոտ 480 դրամի շրջանակներում է, ինչը ապրանքների գների վրա որոշակիորեն է ազդում: Ըստ ԿԲ նախագահի գնաճի վրա ազդող երեք հիմնական գործոններ կան, որից առաջինը առաջարկի գործոնն է, երբ համաշխարհային շուկայում պարենի և սննդամթերքի գների աճ է գրանցվում: Մարտին Գալստյանի խոսքով, առաջին գործոնի մեջ է մտնում նաեւ բեռնափոխադրումների եւ լոգիստիկ շղթաների խաթարումները եւ երկրորդը՝ ներքին գյուղատնտեսական ապրանքների որոշակի գնաճն է:
Ըստ ԿԲ ղեկավարի, երրորդ գործոնը պահանջարկի որոշակի առաջանցիկ աճն է արտադրողական առաջարկի նկատմամբ, որի պատճառով այսօր Հայաստանում առկա է 8.9 % գնաճ:
Լուսինե ԲՈՒԴԱՂՅԱՆ
