«Խնդիրն այն է, որ բենզին ձեռք ենք բերում հիմնականում մեկ աղբյուրից։ Ընդ որում, ԵՏՄ-ում հիմա քննարկվում է նավթամթերքի եւ գազի մեկ միասնական շուկայի ստեղծման քաղաքականությունը, որտեղ մենք բարձրաձայնել ենք մի շարք խնդիրներ, օրինակ՝ ԵՏՄ գործընկերների հետ սահման չունենալը»,-ԱԺ տնտեսական հարցերի ու ֆինանսավարկային և բյուջետային մշտական հանձնաժողովների hամատեղ նիստում այսօր 2022թ․-ի պետբյուջեի նախնական քննարկումների ժամանակ այսօր անդրադառնալով բենզինի շուկայի խնդիրներին՝ հայտարարեց տնտեսական մրցակցության պաշտպանության պետական հանձնաժողովի նախագահ Գեղամ Գեւորգյանը։
«Շուկայում հիմնական չորս խաղացող կա։ Իրանից որոշակի քանակի ներմուծում է եղել, սակայն այն ժամանակավոր էր, հետո ծավալն էական նվազեց, ուստի տվյալ շուկան կայուն չի կարելի համարել։ Բենզինի գնի հետ կապված հիմա վերջնական դիրքորոշում չունեմ, որովհետեւ հենց այս պահին ուսումնասիրություն ենք անում»,-հավելեց Գեղամ Գեւորգյանը։
ՏՄՊՊՀ նախագահի խոսքով՝ օբյեկտիվ չէ ակնկալել, որ ՀՀ-ն տարբեր երկրներից ունենալու է նավթամթերքի ներկրման հնարավորություն, որովհետեւ տարածաշրջանային դիրքն ու սահմանների վիճակն է պետք հաշվի առնել․ նավթամթերք ներկրվում է հիմնականում Ռուսաստանից։
Լուիզա ՍՈՒՔԻԱՍՅԱՆ
