ԱԺ ընդդիմադիր «Հայաստան» խմբակցությունը տասներորդ անգամ ԱԺ պաշտպանության եւ անվտանգության հարցերի մշտական հանձնաժողովի նախագահ պաշտոնում առաջադրել էր Արթուր Ղազինյանի թեկնածությունը:
Հանձնաժողովի նախագահ Անդրանիկ Քոչարյանն ամեն դեպքում հնչեցրեց հարցը, որը նախատեսել էր տալ «Հայաստան» խմբակցության ղեկավար Սեյրան Օհանյանին, եթե նա, ըստ ԱԺ կանոնակարգի, ներկա լիներ նիստին: Այն է. «Պարոն Օհանյան, սա ձե՞ր առաջարկն է, թե՞ Ռոբերտ Քոչարյանի առաջարկն է, որովհետեւ այս շրջապտույտն արդեն տրամաբանությունից դուրս է: Այսպես թե այնպես, դուք ինքներդ էլ հասկանում եք, որ մենք սրա օրենսդրական կարգավորումը պիտի տանք եւ որպեսզի երեքշաբթի օրերը չդառնան ղազինյանական օրեր՝ ձեզանից կախված քայլ արեք: Կամ գոնե հարգեք ոչ թե ձեր գործընկերներին, այլ ԱԺ կանոնակարգ-օրենքը եւ եկեք դուք, որպեսզի ձեզ հարցեր տանք»: Անդրանիկ Քոչարյանը համոզված է, որ որոշումներ կայացնողը Սեյրան Օհանյանը չէ եւ դրանք կայացնողին դիմեց՝ ասելով. «ՀՀ-ն պետություն է եւ երբեք չի կարելի օրենքները վերածել շանտաժի գործիքի»:
Հիշեցնենք, նախորդ նիստում նա կարծիք էր հայտնել, որ այս որոշումը կայացրել է Ռոբերտ Քոչարյանը:
Կարդացեք նաև
Ի դեպ, ընդդիմադիր խմբակցության պատգամավորներն այսօր էլ չէին մասնակցում հանձնաժողովի նիստին:
Վիլեն Գաբրիելյան
Ելույթ ունեցավ իշխող ուժը ներկայացնող պատգամավոր Վիլեն Գաբրիելյանը՝ ընդդիմադիր խմբակցությանը մեղադրելով իրավունքի չարաշահման մեջ. «Լավ իմանալով հանդերձ, որ պարոն Ղազինյանը չի ընտրվելու՝ չփոխել թեկնածուին, դա պարզ իրավունքի չարաշահում է եւ երկրորդ՝ ուղղակի անհարգալից վերաբերմունք՝ իրենց ընտրողների նկատմամբ»:
Վահագն Ալեքսանյան
Իշխող ուժը ներկայացնող մեկ այլ պատգամավորի՝ Վահագն Ալեքսանյանի կարծիքով, ընդդիմադիր խմբակցությունը գոնե այս հոբելյանական՝ տասներորդ անգամը ներկայացնելուն պետք է ներկա լիներ:
«Հոբելյանականն էլ չստացվեց»,- քվեարկությունից հետո արձանագրեց Անդրանիկ Քոչարյանը՝ ասելով, որ հանձնաժողովի ծրագրերը չեն տուժելու այս ընտրություն-չընտրությունից: «Վերջերս հայտնի դարձավ, որ պարոն Ղազինյանն իրավունք չունի գաղտնի փաստաթղթերին ծանոթանալու. այ պարոն Օհանյանը կուզեի, որ սրա վրա ուշադրություն դարձնի: Իսկ պաշտպանության եւ անվտանգության խնդիրների մեծամասնությունը նման փաստաթղթեր են: Պարոն Օհանյանին առաջարկում ենք՝ նոր թեկնածությամբ հանդես գալ»,- հավելեց նա:
Նելլի ԳՐԻԳՈՐՅԱՆ
