«ՀԴՄ-ների ոլորտում ի՞նչ վիճակ է, քանակական եւ գումարային առումով ի՞նչ պատկեր ունենք»,-ԱԺ տնտեսական հարցերի ու ֆինանսավարկային և բյուջետային մշտական հանձնաժողովների hամատեղ նիստում այսօր 2022թ․-ի պետբյուջեի նախնական քննարկումների ժամանակ այսօր հետաքրքրվեց ՔՊ-ական պատգամավոր Հովիկ Աղազարյանը։
ՀՀ պետական եկամուտների կոմիտեի նախագահ Ռուստամ Բադասյանը պատասխանեց, որ եթե 2021թ․-ի տասը ամիսները համեմատենք 2020թ․-ի տասը ամիսների հետ, ապա գումարային եւ քանակական աճ կա․ «Կտրոնների առումով տոկոսային աճը կազմում է 22,9, իսկ գումարային առումով՝ 31.3%։ Այսինքն, վարչարարությունն արդյունավետ է, հարկ վճարողների վարքագիծը փոխվել է կամավոր եւ թե մեր իրականացրած քաղաքականության արդյունքում»։
Հովիկ Աղազարյանը չհամաձայնեց՝ թվերն ու այն, ինչ շրջապատում է տեսնում, չեն համընկնում․ «Ավելի հետ ենք գնում․․․եթե ամեն ինչ լավ է, ուրեմն լավ է։ Բայց եթե ակնկալածը չկա, կարո՞ղ ենք այնպիսի օրենք ընդունել, որ եթե քաղաքացին խանութից կամ առեւտրի կենտրոնից դուրս է գալիս առանց ՀԴՄ-ի, իր հանդեպ էլ վարչարարություն կիրառվի»։
Կարդացեք նաև
Ռուստամ Բադասյանը պատասխանեց՝ ՊԵԿ-ը մոտ հարյուր հազար աշխատող պետք է ունենա, որպեսզի դա կարողանա իրականացնել․ «Հարց է առաջանում՝ արդյունավե՞տ է դա։ Եղել է, որ ինձ էլ չեն տրամադրել կտրոնը։ Այո, կա ստվեր, բայց դա չի նշանակում, որ աճ չկա, որքան էլ կյանքում նման երեւույթներ լինեն»։
Պատգամավորը պնդեց՝ այդպես ՊԵԿ-ի ծախսերն իրականում կրճատվելու են, որովհետեւ քաղաքացին առանց գումարի դառնում է ՊԵԿ «աշխատակից»։
Լուիզա ՍՈՒՔԻԱՍՅԱՆ
