«Նախատեսում ենք, որ շրջանառության հարկին վերաբերող բոլոր հարցերը քննարկման առարկա կդառնան 2022թ․-ին»,-ԱԺ տնտեսական հարցերի ու ֆինանսավարկային և բյուջետային մշտական հանձնաժողովների hամատեղ նիստում այսօր 2022թ․-ի պետբյուջեի նախնական քննարկումների ժամանակ հայտարարեց ֆինանսների նախարար Տիգրան Խաչատրյանը՝ անդրադառնալով պատգամավորներից մեկին, թե եկող տարում արդյոք հնարավո՞ր է շրջանառության հարկի շեմի փոփոխություն։
Նախարարը նշեց․ «Սահմանված դրույքաչափը, հարկման շեմը եւ թե ովքեր են այն վճարողները, որոնք պետք է շարունակեն համարվել շրջհարկ վճարող, ովքեր են այն հարկ վճարողներր, որոնք ԱԱՀ եւ շահութահարկ են վճարելու օրենքով սահմանված կարգով, այս ամենը քննարկելու ենք համալիր կարգավորումների հետ միասին»։
Տիգրան Խաչատրյանը հավելեց․ «Մեկ բան միայն կարող եմ ասել մտածելու համար։ Շրջանառության հարկը նպատակ չի ունեցել սահմանել հարկման արտոնյալ պայմաններ։ Եթե նույն գործով զբաղվում են երկու կազմակերպություններ, մեկը տասը տոկոս հարկ է վճարում, մյուսն ավելի քիչ, ստացվում է, որ շրջհարկ վճարողը, լինելով նույն գործունեության մեջ, ավելի քիչ հարկ է վճարում, քան շահութահարկ եւ ԱԱՀ վճարողը։ Սա չի եղել շրջհարկի ներդրման նպատակը։ Նպատակն է եղել, որ հարկը վճարեն նույն չափով։ Եթե հիմնավորենք, որ շրջհարկը ստեղծել է խիստ արտոնյալ պայմաններ, ապա առաջարկելու ենք դրույքաչափը փոփոխելով համադրելի դարձնել հարկման այն բեռը, որը գործում է ԱԱՀ-շահութահարկ-շրջհարկ ռեժիմների պայմաններում՝ նույն գործունեության համար»։
Լուիզա ՍՈՒՔԻԱՍՅԱՆ
