«2022թ․-ի պետբյուջեով կառավարությունը ԱԻՆ-ին հատկացրել է 36 մլն 336 հազար դրամ, որով կիրագործվի հետեւյալ ծրագիրը։ ԱԻՆ-ի մարդասիրական արձագանքման կենտրոնը կդառնա մարդասիրական ականազերծման տարածաշրջանային կենտրոն»,-ազգային ժողովի պաշտպանության եւ անվտանգության հարցերի, ֆինանսավարկային եւ բյուջետային հարցերի մշտական հանձնաժողովների համատեղ նիստում 2022թ․-ի պետական բյուջեի մասին ՀՀ օրենքի նախագծի նախնական քննարկումների ժամանակ այսօր հայտարարեց ՀՀ արտակարգ իրավիճակների նախարար Անդրանիկ Փիլոյանը։
Նրա փոխանցմամբ՝ նշյալ ծրագիրը քննարկել են ՄԱԿ-ի հետ․ «Բանակցություններն ընթացքի մեջ են։ Իսկ քաղաքացիական պաշտպանության միջազգային կազմակերպության հետ բանակցում ենք, որ կենտրոնը տարածաշրջանային ուսումնական բազա դառնա։ Այդ նպատակով արդիական է ռուսական կողմի հետ համատեղ անգարատիպ բազմաֆունկցիոնալ վարժահամալիր ստեղծելու հարցը։ Կենտրոնում կկարողանան վերապատրաստվել ՀՀ-ի եւ տարածաշրջանի այլ երկրների փրկարարներ, ականազերծողներ»։
Լուիզա ՍՈՒՔԻԱՍՅԱՆ
