«Հանձնաժողովի աշխատանքային խմբով եղել ենք սահմանների արեւելյան հատվածում։ Հայտնի է, որ սահմանների երկարությունը եւ բովանդակությունը փոխվել են։ Զինված ուժերը միայնակ չեն կարող ամբողջ ծավալով ծառայություն իրականացնել եւ ինժեներական կառույցներում աշխատել»,-Ազգային ժողովի պաշտպանության եւ անվտանգության հարցերի, ֆինանսավարկային եւ բյուջետային հարցերի մշտական հանձնաժողովների համատեղ նիստում 2022թ․-ի պետական բյուջեի մասին ՀՀ օրենքի նախագծի նախնական քննարկումների ժամանակ այսօր հայտարարեց պաշտպանության եւ անվտանգության հարցերի հանձնաժողովի նախագահ, ՔՊ-ական պատգամավոր Անդրանիկ Քոչարյանը։
«Կարծում եմ՝ հասարակությունը որեւէ ձեւաչափով, հասարակության որոշ շերտեր՝ ուսանողներ․․․ասում ենք, որ բանակի կողքին ենք։ Լավ կլինի, որ դա լինի առարկայական։ Վերցնենք գործիքներ եւ գնանք-մասնակցենք որոշակի ինժեներական աշխատանքների, որպեսզի մեր զինծառայողները կարողանան իրենց առջեւ դրված մարտական խնդրի վրա կենտրոնանալ։ Սա պարզապես հայտարարության տեսքով եմ ասում։ Այդ կարիքների մասին կմանրամասնեմ փակ քննարկման ժամանակ, եթե պետք լինի»,-հավելեց Անդրանիկ Քոչարյանը։
Լուիզա ՍՈՒՔԻԱՍՅԱՆ
