«Խնդիրներից առաջինը քաղաքային պլանավորում բնագավառի կայացումն է։ Երկրորդը․ վերաարժեվորման գործընթացում 10-15 տարի առաջ խոսում էինք պայմանական Կոնդի պահպանության անհրաժեշտության մասին, բոլորը ծիծաղում էին։ Այսօր բոլորը պահպանում են Կոնդը։ Ընդ որում, որեւէ մեկը չգիտի, թե ինչպես են պահպանում»,-Urbanlab.am-ի կազմակերպած՝ «Ալտ ուրբան ֆորումի» ժամանակ այսօր հայտարարեց Urbanlab.am-ի հիմնադիր, ճարտարապետ-քաղաքային պլանավորող Սարհատ Պետրոսյանը։
«Կոնդի շուրջ ընթացող գործընթացները ավելի լավ է չլինեին, քան լինեին։ Բայց դա չի նշանակում, թե մենք այս ճանապարհն իզուր ենք անցել։ Մենք ունեցել ենք կիսահաղթանակներ, կարողացել օրակարգ սահմանել, բայց, ցավոք, շատ քիչ արդյունքի ենք հասել։ Այս գործընթացներից 15 տարի անց կարծում ենք, որ պետք է վերանայենք կատարվածը»,-նշեց նա։
Սարհատ Պետրոսյանի խոսքով․ «Շատ կարեւոր է, որ ապաճարտարապետականացնենք քաղաքային պլանավորումը։ Այսօր շատ ենք տեսնում, որ շատերն ուրախանում են, որ ՀՀ-ում զարգանում է շինարարությունը, իսկ Երեւանում երեք անգամ ավելի շատ շենքեր են կառուցվում։ Բայց արդյոք երեք անգամ ավելի շատ ճանապարհներ կառուցվո՞ւմ են, այգիներ կառուցվո՞ւմ են, որեւէ մեկը մտածո՞ւմ է, թե այսքան շատ կառուցապատման արդյունքում ինչ կլինի Դավիթաշենի կամրջի, Կոմիտասի պողոտայի հետ։ Որեւէ մեկը մտածո՞ւմ է, որ Դալմայի այգու կառուցապատմամբ այդ նոր թաղամասը 30 հազար բնակիչ կունենա՝ առանց դպրոցի։ Ի՞նչ տեղի կունենա դպրոցի ժամին․․․»։
Սարհատ Պետրոսյանը բոլոր նրանց, ովքեր ասում են, թե մասնագետներ չկան, խորհուրդ տվեց ճանաչել Urbanlab.am-ի մասնագետներին, լսել ու կարդալ նրանց՝ բացահայտելու համար ֆանտաստիկ ներուժը, որը, ցավոք, հաշվի չի առնվում որոշումների ընդունման տրամաբանությունում։ «Կարծում էի, որ սերնդափոխության դեպքում կունենանք այլ իրավիճակ։ Ցավոք, այդպես չեղավ։ 2018թ․-ի այսպես կոչված հեղափոխությունից հետո, երբ ողջ երկրում տեղի ունեցավ սերնդափոխություն, իսկ վերջին մեկ-երկու տարում՝ Երեւանի քաղաքապետարանում, եւ մեր սերնդի ներկայացուցիչները դարձան որոշումների ընդունման մաս, ցավոք, ոչ մի բան չփոխվեց։ Ավելին՝ եռապատկված շինարարությունը բերում է նոր մարտահրավերներ։ Արդյոք պատրա՞ստ ենք այդ մարտահրավերներին։ Կարծում եմ՝ եթե պատրաստված ենք, ապա այդ պատրաստվածությունն այսօր այս քննարկման դահլիճում է»,-համոզմունք հայտնեց Սարհատ Պետրոսյանը։
Կարդացեք նաև
Լուիզա ՍՈՒՔԻԱՍՅԱՆ
