Ծաղկաձորում կայացել է Հայաստանի գրողների միության (ՀԳՄ) կողմից անցկացվող ամենամյա երիտասարդական եռօրյա հավաքը, որին մասնակցում էին ստեղծագործող երիտասարդներ եւ գրական ավագ սերնդի ներկայացուցիչները: ՀԳՄ նախագահ Էդվարդ Միլիտոնյանը՝ ողջունելով երիտասարդներին, խոսել է գրողի, գրականության մասին, ապա պատվոգրերով եւ գրքերով խրախուսել մի խումբ երիտասարդ ստեղծագործողների, որոնցից շատերն արդեն ունեն հրատարակած գիրք:
«Ձեզ հետ խոսելիս, քննարկելիս որոշակի թրթիռներ, գաղափարներ են ի հայտ գալիս եւ ընդունվում են մարդու կողմից, անկախ իրենից, ենթագիտակցական շերտերում դրանք նստում են եւ շատ կարեւոր են,-ասել է Էդվարդ Միլիտոնյանը՝ ավելացնելով,- իմացեք, որեւէ գրողի, եթե ինքը ծնվել է այդ տաղանդով, ոչ մեկը չի կարող ասել կամ սովորեցնել` ինչպես գրել»։
Անվանի արձակագիր ու դրամատուրգ Գուրգեն Խանջյանը նշում է, որ երիտասարդների գրական գործերի ծանոթացավ, որոնք տարբերվում էին եւ թեմատիկայով, եւ տրամադրությամբ, եւ ոճով: «Պետք է ասեմ, որ իմ սերնդի արձակագիրների թիկունքը գնալով ամրանում է: Այս սերունդն ինձ մեծ հույսեր է տալիս»,-ասել է Գուրգեն Խանջյանը: Երիտասարդներին իր խորհուրդներով դրամատուրգ, «Գրական թերթի» խմբագիր Կարինե Խոդիկյանն է նեցուկ եղել: «Ներքին ինքնագիտակցումը, որ գրելու եք, թող ձեզ ուղեկցի բոլոր հանգամանքներում: Դա ձեզ շատ կօգնի ամեն ինչում»,-իր խոսքն այսպես է եզրափակել Կարինե Խոդիկյանը:
Կարդացեք նաև
Գրական-երիտասարդական հավաքին ավագ սերնդի ներկայացուցիչ, պոետ Արտեմ Հարությունյանն իր մտքերով եւ արվեստի հանդեպ յուրօրինակ վերաբերմունքով ոգեւորեց մասնակիցներին: Իսկ Նաթելլա Լալաբեկյանը, որը նույնպես իր ստեղծագործական փորձով կիսվել է մասնակիցների հետ, հազվադեպ է լինում Հայաստանում, եւ շատ է կարեւորում նման հանդիպումները, որոնք ուսուցողական, ճանաչողական բնույթ են կրում: «Ամեն մեկն ունի իր ձայնը, եւ դեռ ստեղծագործողներն իրենց էներգետիկ լիցքի շնորհիվ բարձունքների կհասնեն»,-ասել է Նաթելլա Լալաբեկյանը:
Արձակագիր, հրապարակախոս Ալիս Հովհաննիսյանն իր հետաքրքիր մոտեցումներով զրույցներ ունեցավ երիտասարդ արձակագիրների հետ, քննարկվեցին հայ արձակին բնորոշ մի շարք նրբություններ: «Հավաքվածները բոլորն էլ շատ հետաքրքիր երիտասարդներ էին եւ հասկացա, որ շատ չենք հեռացել իրարից՝ սերունդներով»,-ասել է Ալիս Հովհաննիսյանը:
Գրականագետ Արմեն Ավանեսյանն էլ ասում է, որ երիտասարդների ոգեւորությունը պետք է ուղեկցվի գրագիտությամբ եւ պատրաստակամությամբ, որովհետեւ ի վերջո գրիչ վերցնելը պատասխանատվություն է:
«Ծիծեռնակ» ամսագրի եւ հրատարակչության տնօրեն Անուշ Վարդանյանի խոսքով՝ այսօրվա երիտասարդները բավականին տեղեկացված եւ զարգացած են եւ նրանց հետ զրույցներն ուղեկցվում էին ոչ միայն գրողների ու գրականության լայն շրջանակների քննարկմամբ եւ ուսումնասիրմամբ, այլ նաեւ նկարչական աշխարհի ընկալումներով եւ մոտեցումներով: Իսկ արցախցի գրող Սոնա Համբարձումյանը, որը տարիներ շարունակ մասնակցում է ծաղկաձորյան հավաքին, նույնպես կարեւոր է համարում նման հավաքները եւ ասում, որ սա գրական ընտանիքի ամրապնդման, շփման եւ տարակարծության միտում ունի: «Գրական սերնդափոխությունը կա եւ գրականությունը կշարունակվի»,-վստահեցնում է Սոնա Համբարձումյանը:
Գրական-երիտասարդական հավաքի ընթացքում նաեւ կայացավ երիտասարդ ստեղծագործողների գրքերի շնորհանդեսներ, որի կապակցությամբ ՀԳՄ նախագահը շնորհավորել եւ հաջողություններ է մաղթել հեղինակներին:
Էդվարդ Միլիտոնյանն իր խոսքում հատուկ անդրադարձ է կատարել ինքնաճանաչողությանը` այն համարելով կարեւոր եւ առանցքային երեւույթ։ «Ապրենք, իրար սիրելու պայմանով»,-եզրափակել է Էդվարդ Միլիտոնյանը:
Վովա ԱՐԶՈՒՄԱՆՅԱՆ
«Առավոտ» օրաթերթ
28.10.2021
