Դատարաններում գործերի՝ օրենքով սահմանված կարգով բաշխման խախտմամբ, ինչպես նաև Արդարադատության նախարարի կողմից դատավորների նկատմամբ կարգապահական վարույթների հարուցմամբ արդար դատաքննությանը խոչընդոտող փաստերն ուսումնասիրելու նպատակով օրենքի ուժով ընդդիմության նախաձեռնությամբ ստեղծվել է ԱԺ քննիչ հանձնաժողով, որի անդամների թիվը սահմանող որոշման նախագիծն այսօր խորհրդարանի լիագումար նիստում դրվեց քվեարկության։ 25 «կողմ» եւ 1 «դեմ» ձայներով որոշումը չընդունվեց։
«ՔՊ-ն այս նախաձեռնությանը չէր կարող կողմ քվեարկեր, որովհետեւ սա ԱԺ-ի իրավասություններից դուրս է։ Ընդդիմադիր գործընկերներին եւս մեկ անգամ խնդրում ենք հաշվի առնել ԱԺ-ին տրված լիազորությունները։ Եթե նրանք դատական օրենսգրքի անկատարությունն են վկայակոչում, կարող են օրենսդրական վերահսկողություն սահմանել։ Այս քվեարկությանը մասնակցելը կստեղծեր վատ նախադեպ, ինչին չէինք կարող մենք մասնակից դառնալ»,-հայտարարեց «Քաղաքացիական պայմանագիր» խմբակցության պատգամավոր Նազելի Բաղդասարյանը։
«Հայաստան» դաշինքից Արամ Վարդեւանյանն էլ նշեց, որ ՔՊ-ի՝ քվեարկությանը չմասնակցելը հետեւանք չի թողնի, որովհետեւ քննիչ հանձնաժողովն օրենքի ուժով ստեղծված է, պարզապես ՔՊ-ն դրանում անդամներ չի ունենա, եւ այն գործելու է ԱԺ իրավասությունների շրջանակում։
Կարդացեք նաև
Լուիզա ՍՈՒՔԻԱՍՅԱՆ
