Արմեն Գևորգյանի և Ռոբերտ Քոչարյանի գործով նախագահող դատավոր Աննա Դանիբեկյանը քիչ առաջ մերժեց Արմեն Գևորգյանի պաշտպան Ալեքսանդր Կոչուբաևի և Ռոբերտ Քոչարյանի պաշտպան Հովհաննես Խուդոյանի՝ իրեն ինքնաբացարկ հայտնելու միջնորդությունը:
Արմեն Գևորգյանի պաշտպան Ալեքսանդր Կոչուբաևը լքեց դատական նիստերի դահլիճը հետևյալ պատճառաբանությամբ. «Այս իրավիճակում չեմ կարող գտնվել դատական նիստերի դահլիճում և ձևական մասնակցել այս դատավարությանը»: Նախագահող դատավորը հայտարարեց՝ չի թույլատրում:
Ալեքսանդր Կոչուբաևը հայտարարեց, որ արդեն մեկ ամիս է՝ խնդրում է նյութեր տրամադրել, չի կիսում, որ վերաբերելի մասն են տվել նյութերի, քանի որ իրավունք չունեն մասերն ընտրել: Ալեքսանդր Կոչուբաևը հորդորեց դատավորին վեր կանգել այն մտքից, որ սա դարի դատավարությունն է և ֆիքսված օրերը դատավարության փոխել, քանի որ արդեն մեծ ծավալ չի ներառում գործը:
Նախագահող դատավորն ասաց՝ Արմեն Գևորգյանն ունի երկու պաշտպան, և կարող են հարմարեցնել, ուստի օրերը փոխելու կարիք չկա:
Կարդացեք նաև
Մեղադրող դատախազ Գևորգ Բաղդասարյանը միջնորդեց դատական սանկցիա կիրառել Ալեքսանդր Կոչուբաևի նկատմամբ: Դատարանը գտավ, որ պաշտպանի վարքագիծը ոչ իրավաչափ է, որ այն միտված էր դատարանի բնականոն ընթացքը խոչընդոտելուն: Հետևաբար նրա նկատմամբ կիրառեց դատական սանկցիա՝ նկատողության ձևով:
Իսկ ամբաստանյալ Արմեն Գևորգյանը դատարանի՝ գործի ամբողջական նյութերը չտրամադրելու վարքագիծը որակեց որպես «կապրիզ»:
Ռոբերտ Քոչարյանի պաշտպան Հայկ Ալումյանն էլ հայտարարեց. «Մի տարբերակ գտեք, խնդրում եմ, այս դատավարությունն այսպես շարունակվել չի կարող»:
Նախագահող դատավորը համարեց, որ Արմեն Գևորգյանի պաշտպանների բացակայությամբ դատական նիստը շարունակվել չի կարող: Ուստի դատական նիստը հետաձգվեց: Հաջորդ դատական նիստը տեղի կունենա նոյեմբերի 2-ին՝ ժամը 13.00-ին:
Տաթև ՀԱՐՈՒԹՅՈՒՆՅԱՆ
