«Ես խորը հիասթափված եմ եւ դուրս եկա քննարկումից, որովհետեւ չեմ ցանկանում լսել այս խեղկատակությունը»,- խորհրդարանում լրագրողների հետ զրույցում ասաց «Պատիվ ունեմ» խմբակցության պատգամավոր Թագուհի Թովմասյանը՝ դուրս գալով փակ քննարկումից:
Հիշեցնենք, Ազգային ժողովում փակ քննարկում էր տեղի ունենում հայ-ադրբեջանական շփման գծում տիրող իրավիճակի սահմանագծման հարցերի վերաբերյալ: Զեկույցներով հանդես էին գալիս Հայաստանի զինված ուժերի գլխավոր շտաբի պետի առաջին տեղակալ Կամո Քոչունցը եւ Ազգային անվտանգության ծառայության սահմանապահ զորքերի հրամանատար Արման Մարալչյանը։ Հրատապ քննարկում հրավիրելու նախաձեռնությամբ էին հանդես եկել ընդդիմադիր «Պատիվ ունեմ» եւ «Հայաստան» խորհրդարանական խմբակցությունները։
Թագուհի Թովմասյանը հայտարարեց, որ պատգամավորների հարցերին, ըստ էության, պատասխաններ չեն տրվում. «Ինչ հարցնում ենք, ասում են՝ պետական գաղտնիք է: Բայց պետական գաղտնիքի կրողներ կան՝ պատգամավորներ: Նույնիսկ պետական սահմանի չափը չի ասվում, ասում են՝ պետական գաղտնիք է: Սա արհամարհանք է խորհրդարանի նկատմամբ»:
Թագուհի Թովմասյանն իր հարցերը նաեւ հրապարակային հնչեցրեց՝ ինչո՞ւ պատերազմից մեկ տարի հետո էլ կահավորված չեն մեր սահմանները, ի՞նչն էր մեզ խանգարում, ինչո՞ւ է ադրբեջանական զինված ուժերի ստորաբաժանումը հնարավորություն ունեցել հատել ՀՀ սահմանը, երբ մենք պետք է դիմադրություն ցույց տայինք, պաշտպանություն կազմակերպեինք, ինչո՞ւ է հովիվը դիմավորել ադրբեջանական զինուժին: Իր հարցերն ուղղված են եղել Կամո Քոչունցին, որոնց պատասխաններ չեն տրվել:
Կարդացեք նաև
Պատգամավորը քննարկումն անիմաստ է համարում, քանի որ ներկա պաշտոնյաները կամ իրավիճակին չեն տիրապետում կամ ձեւ են անում, թե այդպես է: Նա սա համարում է իշխանության գործելաոճը՝ հարցերին պատասխաններ տալու փոխարեն դրանք կոծկել, բայց հստակեցնում է, որ գուցե կային հարցեր, որոնց այդ պաշտոնյաները իրապես չէին տիրապետում:
Փակ նիստի ավարտից հետո իշխանական պատգամավորներ Անդրանիկ Քոչարյանը և Արմեն Խաչատրյանը չպատասխանեցին լրագրողների հարցերին։
Մանրամասները` տեսանյութում
Նելլի ԳՐԻԳՈՐՅԱՆ
