«Պատերազմից հետո «Հայաստան համահայկական հիմնադրամի» հայտարարած՝ «Մենք ենք, մեր սահմանները» համազգային դրամահավաքի միջոցներից 52 միլիարդը փոխանցվել է պետբյուջե, ինչը տարակուսելի արձագանքների արժանացավ։ Այս հանձնաժողովը միտված է ցրելու անհանգստությունը, որ այս միջոցները ծախսվել են անարդյունավետ, որ եղել են գնումներ, որ եղել են կանխիկացումներ»,-օրենքի ուժով ընդդիմության նախաձեռնությամբ ստեղծված՝ «Հայաստան համահայկական հիմնադրամի» կողմից հավաքագրված եւ ՀՀ պետբյուջե փոխանցված դրամական միջոցների օգտագործումն ուսումնասիրող ԱԺ քննիչ հանձնաժողովի կազմի վերաբերյալ ԱԺ նիստում քննարկման ժամանակ այսօր հայտարարեց քննիչ հանձնաժողովի նախաձեռնող խմբի ներկայացուցիչ, «Պատիվ ունեմ» խմբակցության պատգամավոր Հայկ Մամիջանյանը։
Նա շեշտեց, որ հիմնադրամը կայքում չի հրապարակել աուդիտի տվյալներ․ «Հարցում ուղարկեցի, պատասխանեցին, որ չեն հրապարակում աուդիտի տվյալներ, քանի դեռ չի եղել հոգաբարձուների խորհրդի նիստը։ Մարտին տեղի ունեցած հոգաբարձուների խորհրդի նիստում հենց խորհրդի անդամների պահանջն էր աուդիտի անցկացումն ու հանրությանը արդյունքների ներկայացումը։ Դա տարակուսելի է։ Աուդիտը եղավ ոչ թե արտահերթ, այլ հերթական»։
Հայկ Մամիջանյանը դիմեց իշխանական խմբակցությանը․ «Ձեր առաջնորդն ասել է, որ քննիչ հանձնաժողովի խնդիր չի տեսնում։ Այն ստեղծված է օրենքի ուժով։ Հուսամ՝ ականջալուր կլինեք ձեր առաջնորդի ասածին։ Անգամ եթե ՔՊ-ն անդամների չներկայացնի հանձնաժողովի, այն, միեւնույնն է, ստեղծված է օրենքի ուժով»։
Ապա «Քաղաքացիական պայմանագրի» պատգամավոր Վլադիմիր Վարդանյանը հետաքրքրվեց՝ հանձնաժողովի անդամների թիվը մեկով ավելացնելու եւ 11 դարձնելու առաջարկն ընդդիմության համար ընդունելի՞ է։ Մամիջանյանը պատասխանեց, որ այդպես կավելանա ՔՊ անդամների թիվը հանձնաժողովում, բայց իրենք չեն առարկում։
Կարդացեք նաև
Հայկ Մամիջանյանը նաեւ հույս հայտնեց, որ այս հանձնաժողովի շնորհիվ շատ սրիկայություններ կբացահայտվեն։
Հիշեցնենք, որ ՔՊ-ից Վիգեն Խաչատրյանն այսօր արձագանքել էր սրիկայությունների վերաբերյալ Մամիջանյանի ասածին, ինչից հետո նիստերի դահլիճում միջադեպ էր եղել։
Լուիզա ՍՈՒՔԻԱՍՅԱՆ
