«Երեւի դուրը չեկավ, որ ԱԺ ամբիոնից Արցախ պաշտպանող պետք է լինի»,- խորհրդարանում լրագրողների հետ զրույցում ասաց «Հայաստան» խմբակցության պատգամավոր Գեղամ Մանուկյանը՝ անդրադառնալով քիչ առաջ նիստերի դահլիճում տեղի ունեցածին:
Հիշեցնենք, խորհրդարանի նիստերի դահլիճում այսօր հերթական միջադեպը գրանցվեց ընդդիմադիր եւ իշխանական պատգամավորների միջեւ: ՔՊ-ական պատգամավոր Վիգեն Խաչատրյանի ելույթից հետո, ամբիոնին մոտեցավ «Հայաստան» խմբակցության պատգամավոր Գեղամ Մանուկյանը: Արձագանքելով Վիգեն Խաչատրյանի ելույթին՝ նա ասաց. «Արցախ ուրացողը դավաճան է»: Դրանից հետո դահլիճում իրավիճակը լարվեց: Հայտարարվեց ընդմիջում:
Գեղամ Մանուկյանը պարզաբանեց, թե ինչո՞ւ հակադարձեց Վիգեն Խաչատրյանին. «Բազմաթիվ կուսակցություններ փոխած՝ 1990 թվականին կոմկուսով խորհրդարան մտած, ռամկավար դարձած, ՀՀՇ-ի հետ, բոլորի հետ աշխատած Վիգեն Խաչատրյանն օրերս իրեն թույլ էր տվել ասել, որ «Հայաստանի ապագան պայմանավորված է Արցախով» ձեւակերպումը սխալ է, մենք ուղղակի պետք է մտածենք՝ Արցախում ապրող այդ մարդիկ անվտանգ լինելո՞ւ են Ադրբեջանի կազմում, թե՞ ոչ՝ ինքնաբերաբար ուրանալով Արցախը, Արցախի հարցը»:
Ըստ բանախոսի, ցանկացած խելամիտ մարդ, այդ թվում նաեւ՝ բոլորը, ովքեր «ի տարբերություն խաչատրյան վիգենների» պայքարել են Արցախի համար, հանուն իրենց զոհված ընկերների, պետք է իրերն իրենց անուններով կոչեն, ինչն էլ ինքն արել է: Գեղամ Մանուկյանը չի հասկանում թե իր որակման համար ինչո՞ւ Ռուբեն Ռուբինյանը վատ զգաց՝ ուրանալով նաեւ իր հոր՝ ԱԺ նախկին փոխնախագահ Կարապետ Ռուբինյանի պայքարը:
Կարդացեք նաև
Այլ մանրամասները՝ տեսանյութում
Գեղամ Մանուկյանին հարց ուղղվեց նաեւ ԱԺ փոխնախագահ Ալեն Սիմոնյանի՝ Կիպրոս այցի ժամանակ տեղի ունեցած միջադեպի մասին՝ նկատելով, որ կազմակերպիչները դաշնակցականներ են եղել: Գեղամ Մանուկյանն ասաց, որ բողոքի ցույցի մասնակիցների մեջ եղել են նաեւ դաշնակցականներ, ինչի համար ինքը հպարտ է, քանի որ այդ մարդիկ տասնամյակներ պայքարել են հանուն Արցախի:
Նելլի ԳՐԻԳՈՐՅԱՆ
