«Այո, պետք է շատ աշխատել, բայց այնպես չէ, որ հայ ժողովուրդն աշխատասեր չի։ Ոչ, առավել քան աշխատասեր է։ Այլ հարց է, որ պետական ու քաղաքական պաշտոնյաներն ավելի շատ պետք է աշխատեն»,-ԱԺ լիագումար նիստում այսօր հայտարարեց «Հայաստան» դաշինքի պատգամավոր Արամ Վարդեւանյանը։
Հիշեցնենք, որ էկոնոմիկայի նախարար Վահան Քերոբյանը զեկուցում է «Տոների եւ հիշատակի օրերի մասին» օրենքում փոփոխություններ կատարելու վերաբերյալ կառավարության նախագիծը, որով հունվարի 2-5-ը եւ հունվարի 7-ը դառնում են աշխատանքային օրեր։ Քերոբյանն այսօր, դիմելով ընդդիմությանը, ասել էր, որ դեռեւս նախկին վարչապետ Կարեն Կարապետյանն է նման նախագծին կողմ եղել։
«Հայաստան» դաշինքից Արամ Վարդեւանյանն ուղղեց նրան․ «Այո, երբ Կարեն Կարապետյանն էր որպես վարչապետ ներկայացրել նման նախագիծ, հունվարի 2-ը եւ 7-ը ոչ աշխատանքային օրեր էին մնում, եւ դա, կարծում եմ, առավել քան տրամաբանական է։ Մեր խմբակցությունը ներկայացնելու է առաջարկ, որ ամսի 2-ը եւ 7-ը լինեն ոչ աշխատանքային։ Ի դեպ, պարոն Քերոբյանը չի անդրադարձել այն փաստին, որ ըստ ԱԺ աշխատակազմի կարծիքի՝ այս նախագիծը չի համապատասխանում նորմատիվ իրավական ակտերի մասին օրենքին, որովհետեւ պարունակում է միայն տնտեսական ակտիվության ցուցանիշների մասին հիմնավորումներ»։
Կարդացեք նաև
«Քաղաքացիական պայմանագրի» պատգամավոր Գեւորգ Պապոյանն էլ իր հերթին ասաց՝ որոշ դեպքերում օրենսդրությունը չի նպաստում աշխատանքային մշակույթի ամրապնդմանը․ «Աշխատանքի պետք է գալ 08:45-ին, ոչ թե 09:15-ին»։ Ապա Պապոյանն անդրադարձավ Արամ Վարդեւանյանի ելույթի այն հատվածին, որում նա պնդում էր անցումային դրույթ սահմանել եւ նախագծում նշված օրերը նախ աշխատանքային դարձնել միայն պետական պաշտոնյաների համար։ «Եթե պոպուլիզմի մասին գիրք գրենք, ապա պարոն Վարդեւանյանի մտքերը դրանում անպայման տեղ կգտնեն»,-հեգնեց Գեւորգ Պապոյանը։
Լուիզա ՍՈՒՔԻԱՍՅԱՆ
