ՀՀ ժողովրդական նկարիչ Հրանտ Թադեւոսյանը՝ Թաթոսը, որը ողջ կյանքում իր նման վառ անհատականությունների հետ է շփվել, Aravot.am-ի հետ զրույցում հիշեց, որ իր արվեստանոց հաճախ նաեւ Անդրանիկ Մարգարյանն էր գալիս:
«Ասում էր՝ Հրո ջան, մի 15 րոպեով գամ, գալիս էր ու մինչեւ գիշերվա 5-ը մնում»,-պատմեց նկարիչը:
Երվանդ Քոչարի ու Գառզուի հետ կապված մի դրվագ էլ հիշեց Հրանտ Թադեւոսյանը. «Մի շրջան վարձով էի ապրում եղբորս հետ, կիսանկուղային բնակարան էր, ցածր առաստաղով: Մի անգամ Քոչարն ու Գառզուն եկան, դուռը շատ ցածր էր, միշտ կռացած էինք ներս մտնում: Քոչարն էլ բարձրահասակ չէր: Բայց երբ անցավ, ցիլոն գլխից ընկավ: Շրջվեց, ասաց՝ Բուլո ջան, վաղը բոլորին կասես, որ երբ Քոչարը մտավ տուն, գլուխը կպավ դռանը: Նկատի ուներ՝ իբր բարձրահասակ է (նորից ժպտում է- Գ.Հ.)…
Կարդացեք նաև
Մի նկար ունեմ՝ Մոսկվայի հայկական եկեղեցուն եմ նվիրել… Աստիճանների վրա սրբեր են՝ Հայաստան աշխարհի մուտքն է: Սրբերը աստիճանի վրա են, ինչը նշանակում է, որ Հայաստան մտնելիս պետք է ոտքերը հանել, նոր մտնել՝ որպես սրբավայր: Քոչարն ու Գառզուն ֆրանսերեն էին խոսում նկարիս մասին, ես էլ մի քիչ հասկանում էի: Ասացի՝ մաեստրո, իզուր ես ուրիշերեն խոսում, մեկ է հասկանում եմ: Ժպտացին…Ասացին՝ ո՞նց է այս գաղափարը Եվրոպայի վրայից թռել ու հասել Հայաստան, հրաշալի աշխատանք է»:
Հրանտ Թադեւոսյանի հետ զրույցի ուշագրավ մանրամասները՝ տպագիր «Առավոտում»:
Գոհար ՀԱԿՈԲՅԱՆ
