2022 թվականի պետական բյուջեի նախագիծն է քննարկվում ԱԺ մշտական հանձնաժողովների նիստում:
ՀՀ վարչապետ Նիկոլ Փաշինյանը ներկայացրեց իր դիտարկումները՝ ասելով, որ այն անվանել են՝«Ամուր հիմքեր ստեղծելու՝ մեր հնգամյա ծրագրի իրագործման համար»:
Փաշինյանը նաեւ ասաց, որ 2021-ի սեպտեմբերին ՀՀ-ում գրանցվել է վճարվող աշխատատեղերի թվի բացարձակ ռեկորդ՝ 651 հազար 141 վճարվող աշխատատեղ, ՀՀ-ում նման ցուցանիշ երբեւէ չենք ունեցել. «Այս տարվա ցուցանիշը նախորդ տարվանից բարձր է 3%-ով: Ընթացիկ տարվա բարձր՝ 6,4% գնաճի ֆոնին սեպտեմբերին համախառն աշխատավարձի ֆոնդը նախորդ տարվա համեմատ աճել է 15,3%-ով, կամ 19 մլրդ 308 մլն դրամով, իսկ մեկ աշխատողի աշխատավարձը 11,9%-ով աճել է: Էականորեն աճել է արտահանումը»:
Այսպես, Փաշինյանը սկսեց թվարկել, թե որ ոլորտներում է աճ գրանցվել ու նշեց, թե 2022-ի բյուջեն ինչ առաջնահերթությունների վրա է հիմնված՝ անվտանգության համակարգի բարեփոխում ու բարելավում, ենթակառուցվածքների զարգացում, կրթության եւ գիտության արդիականացում. «2022-ին պաշտպանական բյուջեն 2021-ի պլանի համեմատ ավել է 11%-ով՝ կազմելով ավելի, քան 345 մլրդ դրամ: Մենք հետեւողականորեն շարժվելու ենք ՀՀ-ում պրոֆեսիոնալ բանակ ստեղծելու ճանապարհով, բայց դա անելու ենք սահուն, մտածված քայլերով՝ քայլ առ քայլ մեծացնելով զինվորական ծառայության գրավչությունը, բարելավելով սպայի եւ սպայական ծառայության կերպարը, զարգացնելով ու բարելավելով ՀՀ պաշտպանական դոկտրինը: Անվտանգային նոր միջավայրում մեր երկրի սահմանների պաշտպանությունը շարունակում է մնալ կարեւորագույն առաջնահերթություն եւ խնդիր ենք դրել ամեն տարվա հետ սահմանների պահպանության գործառույթը ավելի շատ իրականացնել սահմանապահ զորքերով»:
Կարդացեք նաև
Նա ասաց, որ հետագայում ուզում են հասնել նրան, որ սահմանները պաշտպանեն միայն սահմանապահ զորքերը: Փաշինյանը հավելեց. «Սոթք-Խոզնավար հատվածից ադրբեջանական զինված ուժերի դուրս բերման եւ ՀՀ-ի ու Ադրբեջանի սահմանների սահմանազատման եւ սահմանագծման գործընթացի մեկնարկը բարենպաստ պայմաններ կստեղծի այս խնդրի լուծման համար»:
Ինչ վերաբերվում է մեր երկրի պաշտպանական ռազմավարությանը՝ Փաշինյանն ընդգծեց, որ ՀՀ-ն ինչպես ցանկացած խաղաղասեր պետություն, ԶՈՒ-ն զարգացնելու եւ է ոչ թե ագրեսիայի, այլ ագրեսիայից պաշտպանվելու համար. «ՀՀ-ն տարածքներ նվաճելու մտադրություն չունի»:
Հռիփսիմե ՋԵԲԵՋՅԱՆ
