Հոկտեմբերի 21-ին մեկնարկեց «Հայաստան-Ինժեներական շաբաթ 2021» միջոցառումների շարքը: «Ինժեներական շաբաթը» ճարտարագիտության ոլորտում հայաստանյան ամենամյա գլխավոր իրադարձությունն է:
Այսօր այն հասավ նաեւ Վանաձոր: Շաբաթվա առաջին երեք օրերի ընթացքում ինժեներները ներկայացրել են ավտոմոբիլային արդյունաբերության, կիսահաղորդչային սարքերի թեստավորման, անլար հաղորդակցության, կենսաբժշկական ճարտարագիտության, բարձր տեխնոլոգիական արտադրության, ավիատիեզերական արդյունաբերության, գիտության եւ մի շարք այլ ոլորտներում վերջին նվաճումները:
Իսկ Վանաձորի տեխնոլոգիական կենտրոնում տեղի ունեցավ մասնագիտական քննարկումների ամփոփիչ միջոցառումը: Կազմակերպիչների համոզմամբ՝ պատերազմն այս ոլորտում նույնպես փոխեց պահանջները. «Պատերազմից հետո բոլորիս համար պարզ դարձավ, որ մենք չենք կարող այն տեմպերով, որով ապրում ենք, շարունակենք ապրել: Պետք է ամեն ինչ 100 անգամ ավելի արագացնենք եւ հասկանանք, որ մենք աշխարհում մենակ ենք եւ պետք է շատ հարցերում նաեւ տեխնոլոգիաների զարգացման մասով հույսը դնենք մեզ վրա: Դրա համար միջոցառման մեխը լինելու է, որ մենք տեղեկատվական ու ինժեներական տեխնոլոգիաներով կարողանանք այդ լույսը սփռել ոչ միայն մեր համայնքում, այլ նաև ամբողջ երկրում: Նաեւ մտածենք այն լուծումների մասին, որը կզարգացնի ոչ միայն մեր ոլորտը, այլ նաեւ մյուս ոլորտները»,- ասում է Ձեռնարկությունների ինկուբատոր հիմնադրամի նախագահ Բագրատ Ենգիբարյանը:
Կարդացեք նաև
Արդեն 5-րդ անգամ կազմակերպվող «Ինժեներական փառատոն-շաբաթն» այս անգամ էլ մասնակիցների պակաս չի ունեցել: Վերջիններս ներկայացնում էին ինչպես Հայաստանի տարբեր քաղաքներն, այնպես էլ նաեւ արտերկիրը:
Պոլիտեխնիկական համալսարանի ուսանող Երվանդ Տերտերյանը նախկինում ձայնից էլեկտրոէներգիա ստացող սարք էր ներկայացրել: Հիմա ասում է, որ այս անգամ միջոցառմանը մասնակցում է գիտելիքների համալրման նպատակով: Մինչ ընկերները կվերադառնան զինվորական ծառայությունից ու կրկին բոլորով գործի կանցնեն. «Լսում եմ ինժեներական ոլորտի հիմնախնդիրների մասին, թե ինչ քայլեր են ձեռնարկվում ինժեներությունը Հայաստանում զարգացնելու համար: Նախ հասարակությունը պետք է զարգացած լինի, ինչ-որ չափով պատկերացում ունենա տեղեկատվական անվտանգության ոլորտից, ճիշտ օգտագործեն համացանցն ու կարողանան օգտվել ճիշտ ձեւով»:
Մասնագիտական քննարկումների ամփոփիչ միջոցառմանը կհաջորդի Վանաձորի եւ Գյումրու տեխնոլոգիական կենտրոններում անցկացվելիք ինժեներական նորարարական լուծումների ավանդական ուղղությունների եւ ստեղծարար ոլորտների զարգացմանն ուղղված միջոցառումները:
Տաթեւիկ ՂԱԶԱՐՅԱՆ
