«Պետք է ամեն օր այնպես անել, որ Արցախ այցելությունը դառնա պարտավորություն: Եթե առաջ հաճույքի համար էին գնում, հիմա պետք է գնալ, լինել արցախցու կողքին, որ ինքը չմտածի՝ հաջորդ օրը գնա»,- այսօր «Հայաստանին եւ Արցախին սպառնացող վտանգներն ու դրանց հաղթահարման ուղիները» թեմայով քննարկմանը ասաց քաղաքագետ Թեւան Պողոսյանը:
Նա ասաց, որ կառավարությունն ամեն օր դուրս է գալիս ու ասում՝ այսքան սոցիալական ծրագրեր ենք արել, բայց արդյոք այդ գումարներն ուղղվո՞ւմ են արցախցուն այնտեղ պահելուն՝ ոչ:
Թեւան Պողոսյանը հարցադրում ուներ՝ արդյոք մենք ունե՞նք Արցախի հանրապետության ընկալումը. «ԱԺ-ում Արցախի հետ ունե՞նք միջպետական բարեկամական հանձնախումբ: Ինչքան գիտեմ, թղթի վրա է, բայց ձեւավորված չէ: Քանի՞ ամիս է այս ԱԺ-ն գործում է: Պետք է նախաձեռնել: Արցախում Ադրբեջանի օկուպացիայի մասին օրենք պետք է ընդունեն ու աշխարհով մեկ տարածենք»:
Ըստ նրա, Թուրքիան ու Ադրբեջանը մեծ թուրանի ծրագիրն ու երազանքն ունեն, մենք էլ պետք է մեր ազգային երազանքը ձեւավորենք, ոչ թե թշնամուն թողած՝ ինքներս մեզ բզկտենք. «Ադրբեջանի երազանքը չպետք է իրականացվի ու գնա այնտեղ տեսնի 25 հազարանոց Արցախ: Հակառակը, գնալու է ու տեսնի 180 հազարանոց Արցախ»:
Կարդացեք նաև
Նա հորդորեց մտածել ու նոր ազգային զարթոնք ձեւավորել:
Ադրբեջանագետ Անժելա Էլիբեգովան էլ ասաց, որ, ցավոք, համաքաղաքացիներ ունենք, որոնք համակերպվել են ստեղծված իրավիճակի հետ, պատրաստ են զիջողական ու վախեցած կեցվածքով ապրել: Նա հորդորեց հասարակության հետ աշխատել ու վառ պահել ռեւանշի հասնելու ձգտումը, որովհետեւ պատերազմից հետո հայատյացությունը չի կորել, ադրբեջանցիները պարտվողի բարդույթից ազատվել են ու ատելության քարոզն ավելի է սաստկացել, ագրեսիան անկառավարելի է:
Հռիփսիմե ՋԵԲԵՋՅԱՆ
