Այսօր «Հայաստան» դաշինքը կազմակերպել էր քննարկում՝ «Հայաստանին եւ Արցախին սպառնացող վտանգներն ու դրանց հաղթահարման ուղիները» թեմայով:
ՀՅԴ Բյուրոյի նախագահ Արմեն Ռուստամյանն իր ելույթում ասաց, որ Հայաստանը երկընտրանքի առջեւ է՝ խաղաղություն՝ շնորհիվ Հայաստանի հզորացմա՞ն, թե՞ ի հաշիվ Հայաստանի թրքացման: Նա նշեց, որ տեղի ունեցող գործընթացում մրցակցություն է ՌԴ-ի ու Թուրքիայի միջեւ: Ու հիմա հարց է, թե ինչպիսի տեսք կունենա մեզ համար տարածաշրջանի աշխարհաքաղաքական նոր քարտեզը. «Թուրքիան իր ռազմավարական շահերի գոտի է հռչակել շուրջ 70 պետություն, որտեղ բնակվում են թուրքալեզու ժողովուրդներ: Իսկ այն երկրները, որտեղից կարող են բխել սպառնալիքներ նեոօսմանական ծրագրերին, թիրախավորված են որպես պանթուրքիզմի խոչընդոտներ»:
Ռուստամյանը նշեց, որ պանթուրանական աքցանի մեջ ընկնելով՝ Հայաստանը կարող է վերջնականապես հայտնվել աշխարհաքաղաքական պարկում: Այդ պարկից Հայաստանը հանող եւ աշխարհաքաղաքական գծի վրա պահողն այսօր Սյունիքն է. «Սա է Հայաստանի թյուրքացման աշխարհաքաղաքական հետեւանքը, երբ աշխարհին ոչնչով այլեւս հետաքրքիր չես, իսկ պետության գոյությունը պայմանավորված է բացառապես Թուրքիայի բարեհաճությամբ: Հանուն խաղաղության թուրքացման վերջնարդյունքը հայոց պետականության փլուզումն է անխուսափելիորեն»:
Արմեն Ռուստամյանը նաեւ ընդգծեց, որ Հայաստանի թուրքացումը եւ Արցախի հայաթափումը այս պատերազմից հնարավորինս արագ ու առավելագույնս ստանալու թուրք-ադրբեջանական տանդեմի գլխավոր նպատակն է, ուզում են հասնել հնարավոր ամբողջական կապիտուլյացիային, իսկ այդ վտանգը առավել մեծ ու իրական է դառնում այս իշխանությունների՝ ժողովրդի թիկունքում ժողովրդի ճակատագիրը որոշելու հակաօրինական գործելաոճի պայմաններում. «Գաղտագողի, կատարված փաստի առաջ ժողովրդին կործանարար զիջումների պարտադրելը այս վարչախմբի անխախտ ձեռագիրն է դարձել»: Նա զգուշացրեց, որ կենսական զիջումներ կարող են լինել՝ տարածաշրջանում խաղաղություն հաստատելու պաթետիկ հայտարարությունների ներքո: Արդեն կան անշրջելի հետեւանքներ, վկան սահմաններում տիրող իրավիճակն է: Ադրբեջանը մեր իսկ թողտվությամբ դիրքեր գրավելով՝ պարտադրում է սահմանազատման գործընթաց: Միակ ձեւը դիմադրության օղակ ձեւավորելն է այս ամենի դեմ:
Կարդացեք նաև
Հրանտ Մելիք-Շահնազարյանն ասաց, որ վերլուծելով վերջերս տեղի ունեցած այն միջադեպը, երբ ադրբեջանցիները հայկական վրանի ուղղությամբ էին կրակել, խուճապի տրամադրություններ էին ստեղծել ՀՀ-ում ու Արցախում, ու դա պատահական չի արվում: Իրականում, ըստ նրա, սա ցույց է տալիս, որ դեռեւս դիմադրություն կա: Նա հորդորեց մի քիչ ավելի առաջ նայել ու տեսնել այն սպառնալիքները, որոնք կարող են լինել 5-10 տարի անց:
Հռիփսիմե ՋԵԲԵՋՅԱՆ
