Բռնցքամարտի աշխարհի առաջնությունը կկայանա հոկտեմբերի 24-ից նոյեմբերի 6-ը՝ Սերբիայի մայրաքաղաք Բելգրադում: Մասնակցության հայտ ներկայացրել են 105 երկրների 650 բռնցքամարտիկներ, ինչը ռեկորդային ցուցանիշ է աշխարհի առաջնությունների պատմության մեջ:
ԱԻԲԱ-ն 2021 թվականի օգոստոս ամսից բռնցքամարտում քաշային կարգերն ավելացրել է՝ հասնելով 13-ի եւ Սերբիայում աշխարհի առաջնության մասնակիցները առաջին անգամ չեմպիոնական ոսկե մեդալները կվիճարկեն այս ձեւաչափով:
Առաջին անգամ սահմանվել է նաեւ խոշոր՝ $ 2,6 միլիոն, մրցանակային հիմնադրամ: Ոսկե մեդալակիրները կպարգեւատրվեն $ 100 հազարականով, արծաթե մրցանակակիրները՝ $ 50 հազարականով, իսկ բրոնզե մրցանակակիրները (կիսաեզրափակիչների մասնակիցները)՝ $ 25 հազարականով:
Հայաստանի ազգային հավաքականը գլխավոր մարզիչ Կարեն Աղամալյանի գլխավորությամբ արդեն մրցավայրում է: Մարզչական շտաբը որոշել է, որ մեր բռնցքամարտիկները ռինգում կպայքարեն 11 քաշային կարգերում: Հայաստանը Բելգրադի ռինգում կներկայացնեն. 48 կգ՝ Սեյրան Եղիկյան, 51 կգ՝ Արթուր Հովհաննիսյան, 54 կգ՝ Վահե Բադալյան, 57 կգ՝ Արթուր Բազեյան, 60 կգ՝ Կարեն Տոնականյան, 63,5 կգ՝ Հովհաննես Բաչկով, 67 կգ՝ Գուրգեն Մադոյան, 71 կգ՝ Արման Դարչինյան, 80 կգ՝ Համբարձում Հակոբյան, 92 կգ՝ Նարեկ Մանասյան եւ գերծանր քաշային կարգ՝ Դավիթ Չալոյան:
Կարդացեք նաև
Գլխավոր մարզիչ Կարեն Աղամալյանը հայտարարել է, որ իր տղաները լավ մարզավիճակում են եւ պատրաստ են մենամարտերին:
Աշոտ ՀԱԿՈԲՅԱՆ
