Այսօր Ազգային ժողովում քննարկվում էր Արցախից տեղահանվածների խնդիրը։ Քննարկմանը ներկա էին ԱԺ «Պատիվ ունեմ» խմբակցության պատգամավորները, հրավիրվել էին նաև բռնի տեղահանված արցախցիները։
«Վերադարձ դեպի Քաշաթաղ» հասարակական կազմակերպության ներկայացուցիչ Արմինե Մովսիսյանի խոսքով՝ արցախցիների հիմնախնդիրները, բռնի տեղահանվելուց արդեն 1 տարի անց՝ դեռևս մնում են չլուծված․ «Պետության սոցիալական աջակցության ծրագրերը պատշաճ կարգով չեն իրականացվում։ Շատ մարդիկ այդպես էլ չեն կարողանում դառնալ շահառու և օգտվել ծրագրից։ Օժանդակությունների համակարգը չի աշխատում, օդում կախված է բնակարանային խնդիրը»։
Իր խոսքում «Հադրութի դեօկուպացիա» հասարակական կազմակերպության ղեկավար Մերի Դավթյանը հայտնեց, որ Հայաստանից ունեցել են և ունեն աջակցության ակնկալիք, սակայն պատասխան ազդակները միշտ չէ, որ համարժեք են․ ««Պատիվ ունեմ» և «Հայաստան դաշինք» խմբակցություններին հետևում ենք, տեսնում ենք, որ խորհրդարանում Արցախի հարցը միշտ բարձրացվում է, սակայն պիտի ասեմ, որ դա բավարար չէ։ Մենք ուզում ենք որոշակիություն․ հասարակական խնդիրները մենք ենք փորձում լուծել, սոցիալականը՝ պետությունը, բայց մենք պետք է ունենանք քաղաքական կայունություն։ Մենք ուզում ենք հասկանալ, թե ի վերջո Հայաստանի քաղաքական վերնախավն ինչ դիրքորոշում ունի Արցախի հարցում։ Միջազգային գործընկերներն արդեն հեգնանքով են ասում, որ նույնիսկ Հայաստանը չի ճանաչել Արցախի Հանրապետությունը, ի՞նչ եք ուզում ուրիշներից»։
Քննարկումը վարում էր «Պատիվ ունեմ» խմբակցության պատգամավոր Թագուհի Թովմասյանը, որն, ի պատասխան արցախցիների բազմաթիվ անհանգստությունների՝ հավաստիացրեց, որ Հայաստան-Արցախ հարցերով հանձնաժողով կձևավորվի, որի շրջանակներում առավել արդիական կլինեն բռնի տեղահանվածներին հուզող հարցերի լուծումները։
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
