Լրագրողներից մեկի հարցին՝ կա՞ն ԵՊՀ դասախոսներ, որոնք հրաժարվում են պատվաստվել կամ թեստավորվել, եթե այո, ապա ինչ է լինում նման դասախոսների հետ, ԵՊՀ ռեկտորի պաշտոնակատար Հովհաննես Հովհաննիսյանը Մամուլի ազգային ակումբում կայացած ասուլիսում հետեւյալ կերպ պատասխանեց. «Օրենքի դրույթների համաձայն՝ նախարարի հրամանը մեզ հստակ հնարավորություն է տալիս գործելու, բայց մենք ոչ թե պետք է խոսենք պատժիչ մեխանիզմներից, այլ համոզենք, փորձելով սա դարձնել պրակտիկա»:
Ի թիվս այլ հարցերի, նա անդրադարձավ նաեւ իր ձեւակերպմամբ, երիտասարդության՝ գիտության մեջ մնալու խնդրին: Նա նշեց, որ ՏՏ ոլորտ գնացող եւ ամենաքիչը 400-500 հազար դրամ աշխատավարձ ստացող երիտասարդ՝ գիտության մեջ մնալով եւս կարող է տեղական եւ միջազգային գրանտներով այդ աշխատավարձի չափը կրկնապատկել:
«Տվյալ դեպքում նրա ավելացած արժեքը երկրի ու գիտության համար մի քանի անգամ ավելի կլինի, քան զուտ է IT սեկտոր գնալն է»,-ասաց ԵՊՀ ռեկտորի պաշտոնակատարը: Հավելեց, որ զբաղված են նաեւ ուսանողների պրակտիկաների կազմակերպման եւ վերանայման հարցերով ու ցանկություն ունեն, որ ուսանողները պրակտիկա անցնեն մասնագիտացված հաստատություններում:
Գոհար ՀԱԿՈԲՅԱՆ
