Ապօրինի ծագում ունեցող գույքի բռնագանձման գործով առաջին հայցադիմումն է արդեն մտել դատարան: Aravot.am-ի հարցին՝ այդ օրենքի ընդունման ժամանակ ընդդիմադիրներն ասում էին, որ սա մահակ է՝ քաղաքական դաշտի համար, ի՞նչ սպասենք առաջիկայում, կլինե՞ն այս մեղադրանքով քաղաքական գործիչներ՝ պատասխանեց. «Ես ինձ թույլ չեմ տա ասել, ոչ ողջունում եմ տվյալ դիմումը դատարան, ճիշտ կամ սխալ եմ համարում, որովհետեւ դա կլիներ միջամտություն կոնկրետ դիմումին, բայց ես շնորհավորում եմ հասարակությանը, որ ապօրինի ծագում ունեցող գույքի բռնագանձման օրենսդրությունը սկսել է կիրառվել՝ անկախ նրանից, թե այս պահին ում դեմ է հայցադիմումը: Ես որեւէ անհանգստություն չունեմ, որ սա լինելու է մահակ: Ես տեսնում եմ, թե ինչ ծանր աշխատանք է կատարել դատախազությունը: Ապօրինի ծագում ունեցող գույքի վերադարձը արդեն վաղուց սպասված պահանջն է հասարակության, որ թալանվածը պետք է վերադարձվի հասարակությանը»:
Հարցին, այսինքն, նրանք, ովքեր ապօրինի հարստություն են կուտակել, վստահ լինեն, որ մի օր իրենց դո՞ւռն է սա գալու, ոչ թե մեկ-երկու անձանցով ավարտվելու է՝ նախարարը պատասխանեց. «Ես հուսով եմ, որ գոնե բոլոր դոլարային միլիոնատերերը, որոնք դոլարային միլիոնատեր են դարձել թալանով, անպայման մի օր իրենց թալանը կվերադարձնեն ժողովրդին: Իսկ դրա միակ օրինական ճանապարհը այս օրենսդրությունն է»:
Նա ասաց, որ եթե ապօրինի ծագում ունեցող գույք չէ ու դատարանները կխլեն այդ մարդուց, իրենք պատրաստ են կարգապահական վարույթ սկսել այդ դատավորի նկատմամբ:
Թե ինչպես գիտի, որ թալան է եղել՝ Կարեն Անդրեասյանը վկայակոչեց ԶԼՄ հրապարակումները, հասարակության մեջ առկա տեղեկատվությունը. «Մարդիկ են եղել այս երկրում, որոնք պետական ծառայող են եղել իրենց ամբողջ կյանքի ընթացքում, ստացել են չնչին աշխատավարձեր ու դարձել են դոլարային միլիոնատերեր ու այդ միլիոնները նույնիսկ չեն էլ փորձել թաքցնել հասարակությունից: Ավելին, հատուկ եւ դիտավորյալ իրենց ցոփ ու շվայտ կյանքը շպրտել են հասարակության առաջ, որովհետեւ մտածել են, որ լինելու են անպատասխանատու»:
Կարդացեք նաև
Հռիփսիմե ՋԵԲԵՋՅԱՆ
