Գյումրիում պաշտոնապես մեկնարկեցին Բարեկամության զբոսայգու շինարարական աշխատանքները։ Մինչ այս, Բարեկամության զբոսայգու վերակառուցման ծրագիրն ընթացել է մի քանի փուլով․ այգու տարածքում վերջին 20 տնակների բնակիչներին իրենց պահանջներին համապատասխան բնակարանների տրամադրում, հանրային քննարկումների և անտրոպոլոգիական ուսումնասիրության իրականացում, այգու մասնակցային դիզայն-կոնցեպտի մշակում և ռեկրեացիոն ենթակառուցվածքի տարրերի միջազգային ճարտարապետական մրցույթի ամփոփում, վերջնական կոնցեպտուալ նախագծի ներկայացում, ֆոնդհայթհայթմանն ուղղված աշխատանքների իրականցում։
Հոկտեմբերի 14-ին այգու շինարարական աշխատանքների մեկնարկը ազդարարվեց խորհրդանշական միջոցառմամբ․ այգու նախկին տնօրենի դուստրը՝ Նարինե Ազարյանը գյումրեցի երիտասարդների մասնակցությամբ արխիվային թղթադրամ տեղադրեց այգու տարածքում։ Միջոցառմանը մասնակցում էին ՀՀ կառավարության, տեղական ինքնակառավարման մարմինների և հասարակական կազմակերպությունների ներկայացուցիչներ, Գյումրի համայնքի բնակիչներ, արվեստագետներ և քաղաքի հյուրեր։
«Այսպիսի հրաշալի ենթակառուցվածքները լուրջ ձգողության կետեր են առաջացնում ընդհանրապես Հայաստանի համար, և մարդիկ, ովքեր գալիս են Հայաստան, կունենան ևս մեկ լավ առիթ այցելելու Գյումրի։ Բոլորիս շնորհավորում եմ այս լավ նախագիծը սկսելու առիթով և մաղթում, որ գյումրեցիները հնարավորինս շուտ ունենան այս այգին»,-ասաց ՀՀ էկոնոմիկայի նախարար Վահան Քերոբյանը:
Շառլ Ազնավուրի անվան հրապարակի մոտ գտնվող և 7,2 հա տարածք զբաղեցնող այգու վերակառուցման ծրագիրն իրականացնում է «Զբոսաշրջության և քաղաքաշինության» (TUF) բարեգործական հիմնադրամը՝ որպես հանրային-մասնավոր համագործակցության և սոցիալ-տնտեսական զարգացման անդրանիկ մոդել Գյումրիում։
Կարդացեք նաև
Ծրագրի ընդհանուր բյուջեն կազմում է 11,8 մլն դոլար, որից 3,2 մլն դոլարն արդեն ներդրվել է hիմնադրամի գործընկեր կազմակերպությունների և մի շարք անհատ բարերարների կողմից։ ՀՀ կառավարությունը 1,6 մլն դոլարով մասնակցում է զբոսայգու տարածքի և հարակից փողոցների ինժեներական ենթակառուցվածքների հիմնանորոգման աշխատանքներին` Համաշխարհային բանկի վարկավորմամբ իրականացվող «Տեղական տնտեսության և ենթակառուցվածքների զարգացում» ծրագրի շրջանակում։
«Ես շնորհակալ եմ թե՛ համայնքի ղեկավարությանը, թե՛ կառավարությանը, թե՛ Համաշխարհային բանկին, թե՛ «Ազնավուր» հիմնադրամին ու մեր բոլոր գործընկերներին, որոնք արել են ամեն ինչ, որպեսզի այս նախագիծն իրականանա: Ես վստահ եմ, որ այգին կդառնա Գյումրիի ամենասիրված վայրերից մեկը: Սա հավակնոտ նախագիծ է, որը ժամանակ, աշխատանք ու ներդրումներ է պահանջում: Ուստի, եկեք այնպես անենք, որ այս այգին իսկապես օրինակ դառնա աշխարհի համար, ոչ միայն Հայաստանի ու Գյումրիի»,- ասաց «Քաղաքաշինության և զբոսաշրջության» (ТUF) բարեգործական հիմնադրամի համահիմնադիր Ռուբեն Վարդանյանը։
Վերականգնված Բարեկամության այգին ոչ միայն կխթանի Գյումրիի զբոսաշրջային աճը, այլև կզարգացնի քաղաքի ենթակառուցվածքները՝ կամուրջ հանդիսանալով Գյումրիի պատմական կենտրոնի՝ Կումայրիի, և արդյունաբերական ու բնակելի թաղամասերի միջև:
«Ուրախ եմ, որ նման մեծ նախագծի սկիզբ ենք դնում: Կառավարություն, համայնք և հիմնադրամ եռանկյունու համագործակցությամբ մենք կունենանք հրաշալի միջավայր Գյումրիում: Մոտ 900 միլիոն դրամի աշխատանքներ կիրականացվեն և այգու հարակից տարածքը իր ենթակառուցվածքներով ամբողջությամբ կբարեկարգվի։ Բոլորս ամեն ինչ կանենք, որ այն ինչ մեր մտքում է, գաղափարներում և թղթի վրա, դառնա գեղեցիկ իրականություն»,- ասաց ՀՀ տարածքային կառավարման և ենթակառուցվածքների նախարար Գնել Սանոսյանը։
Միջոցառման ավարտին մասնակիցները կարճ շրջայց ունեցան այգու տարածքում կոնցեպտուալ նախագծի հեղինակների և նախագծում մասնակցություն ունեցող համայնքի երիտասարդների ուղեկցությամբ։
«Զբոսաշրջության եւ քաղաքաշինության» (TUF) բարեգործական հիմնադրամի Հանրային կապերի բաժին
