«Երբ թույլ, վախկոտ մարդն իշխանություն է ստանում, տիրապետում է ուժային լծակների, հասարակության համար դառնում է վտանգավոր: Նման դեպքերում հասարակությունը պաշտպանվելու քիչ միջոցներ ունի»,- այսօր «Դեպի բռնապետություն. հետընթաց իրավունքներից» թեմայով քննարկմանը այսպիսի գնահատական տվեց «Հայաստան» խմբակցության պատգամավոր Աղվան Վարդանյանը:
Նա ասաց, որ ՍԴ-ի «վահեգրիգորյանացումից» եւ դատական համակարգում Գագիկ Ջհանգիրյանից հետո եւ ընթացքում բնական է, որ հաջորդ թիրախը լինելու են ԶԼՄ-ները եւ խոսքի ազատությունը:
Աղվան Վարդանյանն ասաց, որ ռազմական դրության եւ արտակարգ դրության պայմանները հնարավորություն են տվել իշխանությանը է՛լ ավելի սրել օղակը: Ըստ պատգամավորի, ԶԼՄ-ների ֆինանսական հոսքերը կրճատում են՝ սկսած գովազդներից, մինչեւ տուգանքներ. «Կազմակերպված արշավ է մամուլի դեմ, սոցցանցերում»:
Նա տեղեկացրեց, որ «Հայաստան» խմբակցությունը շրջանառության մեջ է դրել նախագիծ, որը վիրավորանքը քրեականացնող հոդվածը ուժը կորցրած ճանաչելուն է ուղղված. «Խոսքի ազատության բազմաթիվ պաշտպաններ, ՀԿ-ներ, որոնք տարիներ շարունակ իբր այդ առաքելությամբ են հանդես եկել եւ տարիներ շարունակ այդ անվան տակ ստացել են տասնյակ միլիոնավոր դոլարների գրանտներ, աջակցություններ, իրականում այդ միլիոնները երբեք էլ մամուլին չեն ծառայել ու նրանք այսօր բացարձակ չեն խոսում սահմանափակումների մասին»:
Կարդացեք նաև
Աղվան Վարդանյանն ասաց, որ սա մեկ անձի իշխանություն է ու նրա հրահանգով են ամեն ինչ անում. «Ես խորապես համոզված եմ, որ այդ մարդու վզից՝ զրահաբաճկոնից վերեւ, կախվելու են ժանգոտ կողպեքներ, իսկ ճակատին դաջվելու է «մամուլի թշնամի» դրոշմը»:
Ժուռնալիստների միության նախագահ Սաթիկ Սեյրանյանն ասաց, որ այն, ինչ կատարվում է մամուլի դեմ, խոսքի ազատության, ու հասարակության դեմ է:
Հռիփսիմե ՋԵԲԵՋՅԱՆ
