Եռակողմ պայմանավորվածությունից հետո հրադադարի ռեժիմը կրկին խախտվել է Ադրբեջանի կողմից. Aravot.am-ի զրուցակիցն է ԱՀ նախագահի միջազգային հարաբերությունների հարցերով խորհրդական Նելլի Բաղդասարյանը
-Երեկ՝ հոկտեմբերի 14-ին իրավիճակը արցախա-ադրբեջանական շփման գծում կտրուկ լարվածություն գրանցեց: Ինչո՞վ էր դա պայմանավորված:
-Լարվածության պատճառները բազմաթիվ են, բայց որպես առիթ պետք է համարել ադրբեջանական դիպուկահարի կողմից Մարտակերտի շրջանի խաղաղ բնակիչ Տեփնանցի սպանությունը: Հոկտեմբերի 14-ին Ադրբեջանի ԶՈՒ հայտարարեցին հայկական կողմի դիպուկահարի կրակոցից ադրբեջանցի զինծառայողի սպանության մասին, ինչը ԱՀ ՊԲ-ն պաշտոնական հայտարարությամբ հերքեց և որոշակի մանրամասներ հաղորդեց: Գործը խաղաղապահության կողմից հետաքննության փուլում է:
Հոկտեմբերի 14-ին նախորդած միջադեպերին հետևեց շփման գծի մի շարք ուղղություններում իրավիճակի լարումը, ադրբեջանական կողմը կիրառել է ԱԹՍ, որի հետևանքով ունենք 6 վիրավոր, որոնցից 2-ի վիճակը կայուն ծանր էր, բայց բարեհաջող վիրահատության արդյունքում նրանց կյանքին ևս վտանգ չի սպառնում:
Կարդացեք նաև
Հոկտեմբերի 14-ին ադրբեջանական կողմը շփման գծի մի շարք ուղղություններում կիրառել է նաև խոշոր տրամաչափի զենքեր: ԱՀ ՊԲ հաղորդագրության համաձայն՝ ՊԲ հրամանատարությունը ԱՀ իշխանությունների հետ համատեղ համակարգված աշխատանք է տանում ուղղված իրավիճակի լիցքաթափմանը: Փաստացի, ստեղծված իրավիճակում գործադրվում են բոլոր մեխանիզմները հրադադարի ռեժիմը կայունացնելու ուղղությամբ:
Կատարվածը ԵԱՀԿ Մինսկի խմբի համանախագահության տարածաշրջան սպասվելիք այցին նախորդող ադրբեջանական կողմի սադրանք էր: 2020 թ. Եռակողմ պայմանավորվածությունից հետո տեղի ունեցածը հրադադարի ռեժիմի խախտման առաջին խոշոր և մասշտաբային միջադեպն է, որի ամբողջ պատասխանատվությունը կրում է Ադրբեջանը: Իհարկե, միջադեպի ուղղությամբ հետաքննություն իրականացվելու է, բայց կարծում եմ, որ անհրաժեշտություն կա շփման գծի մշտադիտարկման և վերահսկման լրացուցիչ տեխնիկական միջոցների:
Կարծում եմ, որ խնդիր կա ՌԴ կողմից առանց տողատակերի խոսելու Ադրբեջանի և Թուրքիայի հետ, որոնք ստեղծված իրավիճակի հիմնական պատասխանատուներն են: Նման միջադեպերը կարող են այնքան պարբերական բնույթ ունենալ, որքան Թուրքիան ներկայացված է տարածաշրջանում Ադրբեջանի կողքին: Նման գործողությունները նպատակ ունեն զրոյացնելու ՌԴ խաղաղապահության դերը, դրանով իսկ վերջինիս դուրս մղելու տարածաշրջանից:
Նելլի ԳՐԻԳՈՐՅԱՆ
