Լեռնային Ղարաբաղաում ռուս խաղաղապահ զորամիավորման հրամանատարությունը համապատասխան քննություն է անցկացնում՝ կապված Մարտակերտի շրջանում խաղաղ հայ բնակչի սպանության հետ: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Հոկտեմբերի 9-ին Մարտակերտի շրջանում ադրբեջանական կողմից կրակից մահացու վիրավորում է ստացել խաղաղ բնակիչ: Մենք ցավակցում ենք զոհվածի բոլոր հարազատներին և մերձավորներին»,- ասել է Զախարովան:
Նրա խոսքով՝ իրենց պատասխանատվության գոտում միջադեպեր թույլ չտալու ուղղությամբ ջանքերը համակարգելու համար ռուս խաղաղապահները շարունակում են անխափան գործակցությունը Հայաստանի և Ադրբեջանի գլխավոր շտաբերի հետ:
Զախարովան նշել է, որ նման ողբերգական միջադեպերը էլ ավելի են ընդգծում երեք երկրների առաջնորդների բոլոր հայտարարությունների և առաջարկների պահպանման կարևորությունը:
Կարդացեք նաև
«Մենք կողմերին կոչ ենք անում հնարավորինս արագ հաղթահարել փոխադարձ գրգռիչները մարդասիրական դաշտում, փոխանակել ռազմագերիներին բոլորը բոլորի դիմաց սկզբունքով և լիարժեք կերպով փոխանակվել ականապաշտ դաշտերի քարտեզներով»,- ասել է նա:
Զախարովան նաև նշել է, որ Ռուսաստանը մշտապես հանդես է գալիս երեք երկրների ղեկավարների միջև ձեռք բերված պայմանավորվածությունների պահպանման օգտին:
«Մենք ակնկալում ենք, որ այդպիսով անհրաժեշտ պայմաններ կստեղծվեն Բաքվի և Երևանի միջև հարաբերությունների կարգավորման, այդ թվում առկա բարդ երկկողմ հարցերի լուծման համար»,- ասել է ԱԳՆ ներկայացուցիչը:
Զախարովան նաև պատասխանել է երեք երկրների հոգևոր առաջնորդների հոկտեմբերի 13-ին տեղի ունեցած հանդիպման մասին հարցին՝ նշելով, որ դա ևս մեկ կարևոր ձևաչափ է խնդիրները հաղթահարելու և վստահության մթնոլորտ ստեղծելու, ինչպես նաև հա-ադրբեջանական հարաբերությունները կարգավորելու համար:
«Այս հանդիպումն առաջինը չէր, կրոնական առաջնորդների միջև շփումները տասնամյակներ շարունակվում են: Դրանք տարբերվում են վստահության աստիճանով, համենայն դեպս դա հետևում է իրենց իսկ տված գնահատականներից,- ասել է Զախարովան: – Մենք, անկասկած տեսնում ենք, որ սա բացառիկ ձևաչափ է, որը կնպաստի կողմերի միջև փոխըմբռնման խորացմանը և միջդավանաբանական երկխոսության խթանմանը»,- ասել է Զախարովան:
Նրա խոսքով հանդիպումը կծառայի հայ-ադրբեջանական հարաբերությունների կարգավորմանը և Հարավային Կովկասում ընդհանուր իրավիճակի առողջացմանը, այդ թվում վստահության ամրապնդմանը, մարդասիրական հարցերի լուծմանը և մշակութային ու կրոնական ժառանգության պահպանմանը:
Պատրաստեց Վիկտորյա ԱՆԴՐԵԱՍՅԱՆԸ
