Այս պահին Հաագայում՝ ՄԱԿ-ի Արդարադատության միջազգային դատարանում (ICJ), անցկացվում են «Ռասսայական խտրականության բոլոր ձեւերի վերացման մասին» միջազգային կոնվենցիայի հիման վրա Հայաստանն ընդդեմ Ադրբեջանի գործով միջանկյալ միջոցներ կիրառելու Հայաստանի միջնորդության լուծման նպատակով հրապարակային բանավոր լսումներ:
Հայաստանը միջազգային դատարանին փաստեր է ներկայացրել Ադրբեջանի կողմից ռասսայական խտրականության վերաբերյալ: Հայկական կողմի ներկայացրած հայցում նշվում է. «Ադրբեջանը տասնամյակներ շարունակ ռասայական խտրականության է ենթարկել Հայաստանին», որն արտահայտվել է նաեւ զանգվածային սպանությունների, կտտանքների եւ այլ խախտումների մեջ: Հայաստանը ՄԱԿ-ի Արդարադատության միջազգային դատարանին (ICJ) խնդրել է կիրառել մի շարք հրատապ միջոցներ՝ այդ թվում Բաքվի ռազմավարի պուրակի փակումը և ռազմագերիներին ու պահվող քաղաքացիական անձանց վերադարձը»:
Կարդացեք նաև
ՀՀ-ի շահերը ներկայացնող Եղիշե Կիրակոսյանը ներկա է դատարանում, իսկ Ադրբեջանի ներկայացուցիչը կմիանա տեսակապի միջոցով:
Եղիշե Կիրակոսյանը ներկայացրեց ՀՀ-ի միջնորդությունը և թե ինչ մեծ կարևորություն ունի ՄԱԿ-ի դատարանի որոշումը տարածաշրջանային անվտանգության համար:
Այս պահին ելույթներով հանդես են գալիս ՀՀ-ի շահերը ներկայացնող պրոֆեսորները:
Յուրաքանչյուր կողմի համար հայտարարությունների մասով տրամադրված է մեկ ժամ: Հոկտեմբերի 14-ի օրվա երկրորդ կեսին՝ Երևանի ժամանակով ժամը 19:00-20:00 հանդես կգան Ադրբեջանի ներկայացուցիչները:
Վաղը՝ հոկտեմբերի 15-ին, լսումները կշարունակվեն նույն գրաֆիկով:
Լսումները նախագահում է ՄԱԿ-ի գլխավոր դատական ատյանի նախագահը։ Նիստերն անցկացվում են հիբրիդային եղանակով:
Եթե ՄԱԿ-ի դատարանը բավարարի ՀՀ-ի միջնորդությունը, ապա Ադրբեջանը պետք է վեց ամիսը մեկ հաշվետվություն ներկայացնի դատարանին իր՝ դատարանի կողմից ներկայացված պահանջները կատարելու առիթով կատարված գործողությունների մասին:
Տաթև ՀԱՐՈՒԹՅՈՒՆՅԱՆ
