«2020 թվականին ՀՀ քրեական օրենսգրքի 178-րդ հոդվածի 2-րդ մասի 2-րդ կետով հարուցված քրեական գործով տուժող Ա.Ի.-ին պատկանող ոսկյա զարդերը (900 000 դրամի չափով) հափշտակվել են Գեւորգ ներկայացած անձի ցուցումով եւ գրավադրվել նախաքննությանն անհայտ անձի կողմից: Նախաքննությանը չէր հաջողվել պարզել գրավադրող անձի ինքնությունը, եւ քրեական գործի վարույթը կասեցվել էր: Հետագայում տուժողին հաջողվել էր պարզել այն անձի տվյալները, ով հնարավոր է՝ իրականացրել է տուժողին պատկանող ոսկյա զարդերի գրավադրումը»,-«Առավոտի» հետ զրույցում երեկ ասաց փաստաբան, տուժողի ներկայացուցիչ Նարինե Աբելյանը:
Կասեցման որոշումը կայացվել է օգոստոսի 31-ին, իսկ փաստաբան-ներկայացուցիչն այն ստացել է սեպտեմբերի 25-ին:
Նա տեղեկացրեց, որ գործի նախաքննությունը Արաբկիրի քննչական բաժնում էր, հետագայում քննիչը տեղափոխվել է քննչական կոմիտե: Երբ փորձել է իմանալ որոշ տվյալներ, մերժել են, պատճառաբանելով, թե՝ բանկային գաղտնիք է պարունակում:
Ստիպված են եղել իրենք հարցումներ անել, տվյալներ ձեռք բերել, որոնք տրամադրվել էին քննիչին: Քրեական գործի վարույթը վերսկսվել է. «Տվյալները տրամադրել ենք հաջորդ քննիչին, վկա-կասկածյալը կանչվել է բաժին, խոստովանել է, անձն ասել է՝ ինքն է գրավ դրել, օգտվել է կասկածյալի կարգավիճակից: Հերթական անգամ տուժողի իրավունքների պաշտպանությունը դարձել է անհնարին: Կա տուժող, չկա կասկածյալ: Փորձել ենք հասկանալ քննիչին, պաշտոնական գրություն ենք ուղարկել, sms հաղորդագրություն, որպեսզի տեղեկություններ տրամադրվի, թե ինչ փուլում է մեր գործը»:
Կարդացեք նաև
Փաստաբանի խոսքով, քրեական գործի նախաքննությունը 1,5 տարուց ավելի է՝ չի ավարտվում: Դեռեւս 2020 թվականի ապրիլին հարուցված քրեական գործի վարույթն արդեն երկրորդ անգամ կասեցվում է չպատճառաբանված. «Որպես կասկածյալ ներգրավման ենթակա անձի ինքնությունը հայտնի չլինելու հիմքով»:
Նյութական վնասի փոխհատուցման հարցը չի լուծված:
Բողոք է բերել դատախազին, նրա պատասխանի ժամկետն անցել է, մոտ օրերս ակնկալում են ստանալ նրա պատասխանը:
Ռուզան ՄԻՆԱՍՅԱՆ
«Առավոտ» օրաթերթ
13.10.2021
