«Հանդիպումներ նախատեսված են. առնվազն պայմանավորվածություններ ձեռք են բերվել գործընթացը շարունակելու և նոր հանդիպումներ կազմակերպելու առումով»,- լրագրողների հարցին՝ արդյոք որպես Նյույորքյան հանդիպումների շարունակություն՝ այլ հանդիպումներ սպասվո՞ւմ են առաջիկայում, ՀՀ ԱԳՆ-ում կայացած Հայաստանի և Հնդկաստանի ԱԳ նախարարների համատեղ մամուլի ասուլիսի ընթացքում պատասխանեց ՀՀ ԱԳ նախարար Արարատ Միրզոյանը:
Նա գոհունակություն հայտնեց նյույորքյան հանդիպումների վերաբերյալ ու ասաց. «ՀՀ-ն ողջունում է համանախագահության շրջանակներում խաղաղ բանակցությունների վերսկսումը, և մենք տեսնում ենք ԼՂ հիմնախնդրի միակ լուծումը խաղաղ բանակցությունների միջոցով և համանախագահության մանդատի շրջանակներում»:
ՀՀ ԱԳ նախարարն ասաց՝ հանդիպումների ընթացքում ձեռք են բերվել կոնկրետ պայմանավորվածություններ ու մանրամասնեց. «Նախ քննարկումներում փորձել ենք լուծում տալ հումանիտար հարցերին՝ հայ ռազմագերիների ազատ արձակում, անհայտ կորած զինվորների և քաղաքացիական անձանց ճակատագրի հետագա պարզաբանում, հայկական մշակութային հուշարձանների մատչելիություն, որոնք մնացել են ադրբեջանական զինված ուժերի վերահսկողության ներքո և մի շարք այլ խնդիրներ: Ապա պայմանավորվածություն է ձեռք բերվել հետագայում ձեռնամուխ լինել ԵԱՀԿ համանախագահության հիմնական բաղադրիչի՝ ԼՂ կարգավիճակի շուրջ քննարկումներին: Խոսվել է այն մասին, որ նախատեսվում է համանախագահների այց տարածաշրջան. առաջիկայում կիմանանք ավելի հստակ դիրքորոշում հարցի վերաբերյալ»:
Կարդացեք նաև
Տաթև ՀԱՐՈՒԹՅՈՒՆՅԱՆ
