«Կանխվել է առաջին հերթին սոցիալական աղետ հասկացողությունը: Բայց խնդիրներ կան, որոնք շաղկապված են իրար»,- այսօր «Տեղահանված ու բռնագրաված Հադրութ. մեկ տարի անց» թեմայով հանրային քննարկման ժամանակ ասաց Հայաստանում Արցախի կառավարության օպերատիվ շտաբի պետ Միքայել Վիրաբյանը:
Քննարկումը կազմակերպել էր «Հայաստան» խմբակցությունը:
Վիրաբյանը նշեց, որ 5294 ընտանիք է տեղահանվել Արցախից՝ 20 հազար 434 մարդ: Սա միայն շտաբի տվյալներն են: Շտաբի տանիքի ներքո գործում են պետական կառավարման ոլորտի ստորաբաժանումներ, որոնք պետական սպասարկում, ծառայությունների մատուցում են իրականացնում տեղահանվածներին:
Կարդացեք նաև
Նա նշեց, որ օգոստոս-սեպտեմբերին շատ էին խնդիրները՝ կապված դպրոցներում երեխաներին տեղավորելու հետ՝ արտահերթ քվոտայով: Բայց մանկապարտեզներում տեղավորելու խնդիրը մինչ օրս լուծված չէ: Երեւանում այդ խնդիրը մինչ այդ էլ կար հենց երեւանցիների համար:
Հաջորդ խնդիրը առողջապահության ոլորտից է: Վիրաբյանն ասաց, որ վերջին մեկ ամսվա ընթացքում խնդիրներ են առաջացել՝ պետպատվերով վիրահատվելու հետ կապված: Բավարարվել են առաջին հերթին այն դիմումները, որոնք անհետաձգելի են: Պլանային կամ կյանքին վտանգ չսպառնացող միջամտությունները լինելու են հաջորդ տարվա եռամսյակում. «Վերջին տասնօրյակին ՀՀ են տեղափոխվել Արցախից 714 անձ՝ 50 ընտանիք, որից 319-ը՝ անչափահաս: Տեղահանվածներից 724 անձ տեղափոխվել է արտերկիր»:
Գեղամ Նազարյան
«Հայաստան» խմբակցության պատգամավոր Գեղամ Նազարյանը հարցրեց՝ տեղահանվածներն ունե՞ն կարգավիճակ: Վիրաբյանը պատասխանեց, որ նրանք հանդիսանում են ՀՀ քաղաքացի, անձնագրի մեջ նշված է ՀՀ, ուստի կարգավիճակի հարց չի առաջանում:
Հռիփսիմե ՋԵԲԵՋՅԱՆ
