«Այն ճանապարհը, որ մենք ենք ընտրել, որ տեսնում ենք այս իրավիճակից դուրս գալու համար, մեր անցած պրակտիկան է: Բոլորս մի փորձության միջով անցել ենք. չկա մեկն այստեղ նստած, որ մի կայծակ կերած չլինի»,- «Կանչ Հայրենյաց» Համահայկական Ազատագրական Միության ստեղծման առիթով հրավիրված մամուլի ասուլիսի ժամանակ հայտարարեց միության համահիմնադիր, «Հայ Ազատմարտի Խորհուրդ» նախաձեռնության ղեկավար Պավել Մանուկյանը:
Նա հիշեցրեց՝ իրենք տարիներ շարունակ ասել են՝ բանակի կորուստ է լինելու, բայց բոլորն իրենց վրա ծիծաղել են: Ըստ նրա՝ հիմա եկել, հասել ենք այդ իրավիճակին:
Հիշեցնենք՝ այսօր հայտարարություն ներկայացվեց «Կանչ Հայրենյաց» միության ստեղծման մասին, որում մասնավորապես ամրագրված է. «Հայրենասերների խմբի կողմից ստեղծվում է «Կանչ Հայրենյաց» Համահայկական Ազատագրական Միությունը, որի հիմնական նպատակն է լինելու ազատագրել ՀՀ-ն այն զավթած թրքասեր իշխանություններից և նրանց ծնունդ տված ու ծածուկ սատարող կեղծ ընդդիմությունից: Այս գործընթացներից անմիջապես հետո ապահովել նոր, արդար ընտրություններ»:
Պավել Մանուկյանը վստահեցրեց՝ իրենց շարքերը կավելանան, բայց միևնույն ժամանակ զգուշացրեց՝ հաղթանակը մեծ զոհաբերություն է պահանջում ու պարզաբանեց. «Դուք չպատկերացնեք, որ այստեղ է վիշապի գլուխը. վիշապն անտեսանելի է: Մեր նպատակն է, որ մեր գրագետ, խելացի երիտասարդների համար ճանապարհ բացենք: Հիմա նրանք կարծես թե միայն Եռաբլուրում են կամ էլ օլիգարխների մոտ՝ վարձկան սուրհանդակ: Բայց նրանց ձեռքին պիտի լինի պետության ղեկը»:
Կարդացեք նաև
Տաթև ՀԱՐՈՒԹՅՈՒՆՅԱՆ
