«ՀՀ պաշտպանության նախարարի 2 տեղակալներից մեկը նախկինում ոստիկան է, մյուսը ներկայացնում է ֆինանսական բլոկը, բանակում չեն ծառայել։ Անձնական առումով որեւէ անձի հետ կապված խնդիր չունեմ: Պատերազմի ժամանակ գերագույն հրամանատարի դիրքում գտնվող անձը բանակում չի ծառայել։ Հիմա այս հարցերը դրել են չորրորդ թղթապանակի մեջ ու ասում են՝ պաշտպանության հանձնաժողովի նախագահի տեղակալը բանակում չի ծառայել, ու դա դարձնել առաջնային խնդիր, որեւէ ձեւով ընդունելի չէ»,-այսօր տեղի ունեցած ասուլիսում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանն՝ անդրադառնալով «Հայաստան» դաշինքի պատգամավոր Արթուր Ղազինյանի՝ պաշտպանության ու անվտանգության հարցերի մշտական հանձնաժողովի փոխնախագահի պաշտոնում արդեն որերորդ անգամ չընտրվելու հարցին:
Նրա խոսքով, եթե Արթուր Ղազինյանն ունենար խնդիր, որն օրինական առումով հարցադրում էր առաջացնում, իհարկե քննարկման առարկա կդառնար ոչ միայն այդ հարթության մեջ։
«Անընդունելի է իշխանության՝ օրենսդրական նախաձեռնության այն մտադրությունը, որը հայտարարվեց հանձնաժողովի նախորդ նիստում, թե նպատակ կա՝ օրենսդրական կարգավորումների ձեւով սահմանափակում մտցնել հանձնաժողովի փոխնախագահի թեկնածուի առաջադրման մասով։ Սրանով, ըստ էության, իշխանությունը օրենսդրական տեսք է փորձում տալ իր ցանկություններին ու քմահաճույքներին»,-ասաց Տիգրան Աբրահամյանը։
Նրա խոսքով, պատերազմից անցել է 11 ամիս, բայց առ այսօր հանձնաժողովում ներկայացված չէ Զինված ուժերի բարեփոխումների հայեցակարգը, արմատական փոփոխությունների չեն ենթարկվել դրա տարբեր բաղադրիչները, այդ թվում՝ մարտական հերթափոխության իրականացումը: Ըստ նրա, մինչեւ Հայաստանի հանրապետությունում անվտանգային համակարգը չվերականգնվի, չարդիականացվի, պատշաճ մակարդակի չբերվի, արտաքին քաղաքական բոլոր գործընթացներում Հայաստանը հանդես է գալու զիջողի դիրքերից:
Կարդացեք նաև
Տիգրան Աբրահամյանն ասաց, որ ԱԺ 7-րդ գումարման խորհրդարանի ձեւավորումից հետո ընդդիմությունն առաջադրել է ԱԺ փոխնախագահ, 3 հանձնաժողովի նախագահներ, 12 հանձնաժողովում ընդդիմությունը փոխնախագահի թեկնածու է ունեցել, որոնք առանց որեւէ խնդրի առաջադրվել են ու ընտրվել։ Սակայն պաշտպանության եւ անվտանգության հարցերի մշտական հանձնաժողովի նախագահի տեղակալի թեկնածուի համար պատճառաբանում են՝ բանակում չի ծառայել. «Այս պարագայում, եթե իշխանության նպատակն է՝ ինտրիգներ ստեղծել, շոուի հնարավորություն ստեղծել, ապա մենք նպատակ չունենք մտնել այդ խաղի մեջ»:
Լուսինե ԲՈՒԴԱՂՅԱՆ
