«Ռեֆորմիստներ» կուսակցության նախագահ Վահան Բաբայանն այսօր խոսելով ՀՀ ներքաղաքական մարտահրավերների եւ գործող իշխանությունների դեմ պայքարի արդյունավետ ուղիների մասին՝ ասաց. «Ես հիմա չեմ ուզենա խոսել այն թեմաներից, որոնց շուրջ ամեն օր խոսում են: Մենք էլ արդեն երեք տարի խոսում ենք ամեն օր, ամեն ինչից, բայց, ցավոք, մեզ ոչ 2018-ին լսեցին, ոչ 2019-ին, ոչ 2020-ին: Առավել եւս, երբ 2020-ի սեպտեմբերի սկզբին դուրս էինք եկել փողոց: Այն ժամանակ մեզ չլսեց նույնիսկ ընդդիմությունը: Այսօր էլ չեն լսում: Չգիտեմ, էլ ինչ պետք է ասենք, որ մարդիկ սթափվեն: Եթե անգամ ամեն ինչ դնենք մի կողմ, նույնիսկ դավաճանության մասին տարբեր մեղադրանքները, գլխավոր փաստարկը, որից պետք է սկսվի ամեն ինչ, այսինքն, փոփոխությունները, այն է, որ քո երկիրը պարտության բերած եւ պարտության փաստաթուղթը ստորագրած իշխանությունը չի կարող շարունակել պաշտոնավարել եւ չի կարող բանակցել հաղթողի հետ: Որեւէ դեպքում այդպիսի բան չի կարող թույլ տրվել:
Ի՞նչ պետք է անի ընդդիմությունը հիմա: Պիտի ընդունի սխալները, որ իրենք թույլ տվեցին: Պետք է միավորվել, առաջարկել կոնկրետ օրակարգ եւ ունենալ կոնկրետ առաջնորդ, որը իր թիմով պատասխանատու կներկայանա ժողովրդին ու կասի, թե ինչ է անելու: Եթե չկա կոնկրետ օրակարգ, չկա ճանապարհային քարտեզ, չկա կոնկրետ մեկ առաջնորդ, մարդիկ չեն գնա փողոցում հավաքվելու»:
Aravot.am-ը հետաքրքրվեց. իսկ «Ռեֆորմիստներ» կուսակցությունը, որպես ընդդիմություն ստեղծված իրավիճակից դուրս գալու կոնկրետ օրակարգ ունի՞, ինչին Վահան Բաբայանը պատասխանեց. «Լավ հարց եք տալիս: Ասեմ, որ այս պահին մենք ներսում օրակարգի ձեւավորման հետ կապված քննարկումների մեջ ենք, որովհետեւ տեսնում ենք, որ կա անելիք եւ այդ անելիքը որքան ուշացվի, այնքան վատ է: Բայց այդ անելիքները պետք է լինեն ռեալ, հստակ, ճիշտ եւ ճիշտ ժամանակին: Այսօր ոչ մի բան ինքնանպատակ չէ, նույնիսկ հանրահավաքներ կամ ակցիաներ անելը: Եթե դա չի ծառայելու նպատակին, որ երկրում իրականում տեղի ունենան փոփոխություններ, գտնում եմ, որ դրանք եւ ժամանակավրեպ եւ անիմաստ գործողություններ կլինեն»:
Կարդացեք նաև
Աշոտ ՀԱԿՈԲՅԱՆ
