Լիազորությունները կասեցված ԲԴԽ նախագահ Ռուբեն Վարդազարյանն այսօր դատարան չէր ներկայացել: Պատճառն այն է, որ Ռուբեն Վարդազարյանն ու նրա պաշտպանը նշանակված դատական նիստի մասին պատշաճ ծանուցում չէին ստացել: Նիստի մասին նրանք իմացել էին «Դատալեքս» համակարգից:
Ռուբեն Վարդազարյանի պաշտպան Հունան Բաղդասարյանը մեր զրույցում ասաց, որ այդ կերպ տեղեկանալը դատարան ներկայանալու համար որևէ պարտավորություն չի առաջացնում: Հետեւաբար, ծանուցված չլինելու պատճառով, պաշտպանական կողմը դատարան չի ներկայացել:
Երևանի ընդհանուր իրավասության դատարանում այսօր նշանակված էր Ռուբեն Վարդազարյանի գործով առաջին դատական նիստը: Դատավորը Մանվել Շահվերդյանն է: Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով, նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի նորանշանակ տեղակալ Անդրանիկ Սիմոնյանի հաղորդման հիման վրա։
Ռուբեն Վարդազարյանի դեմ հետապնդումները սկսվել են 2020 թվականի նոյեմբերի 15-ի հայտնի հայտարարությունից հետո, երբ նա դատավորներին կոչ արեց հավատարիմ մնալ ժողովրդի առջև տված երդմանը և զերծ մնալ բոլոր տեսակի քաղաքական ճնշումներից ու ազդեցություններից։
Կարդացեք նաև
Նելլի ԳՐԻԳՈՐՅԱՆ
