Այսօր ԱԺ ճեպազրույցների ժամանակ ՔՊ խմբակցության պատգամավոր Բաբկեն Թունյանին հարցրեցին՝ դուք, որպես ԱԺ տնտեսական հանձնաժողովի անդամ, հաճախ եք առիթ ունենում քննարկելու կադաստրային արժեքի հետ կապված հարցեր, կարելի՞ է հայրենիքի սահմանները կադաստրի արժեքով, շենք-շինություններով գնահատել ու համարել, որ եթե Շուշիում բնակելի շենք-շինություն չի կառուցվել, ուրեմն կարելի է հանձնել, բազմաթիվ քաղաքներում, օրինակ՝ Չարենցավանում բնակելի շենք կարծես թե չի կառուցվել, կարո՞ղ է հանձնեք Չարենցավանը: Թունյանը պատասխանեց. «Հայրենիքը կադաստրային արժեքո՞վ են չափում՝ բնականաբար, ոչ: Ու որեւէ մեկը նման պնդում չի արել ու նման պատկերացում չունի հայրենիքի մասին: Պարզապես պետք է նկատի ունենալ, որ հայրենիքը միայն կենացներով ու ելույթներով չեն սիրում, հայրենիքի նկատմամբ սերն արտահայտվում է այն բարեկեցիկ դարձնելով, ինչն արտահայտվում է որոշակի ցուցանիշներով՝ ներդրումների չափերով, ձեր նշած կադաստրային արժեքով՝ այդ թվում»:
Թունյանը նաեւ խոսքի ազատության հետ կապված ասաց. «Հայաստանում լրագրողներն այսպիսի խոսքի ազատության մակարդակ չեմ հիշում երբ ունեցած կլինեն: Չեմ հիշում այսպիսի մակարդակ, երբ լրագրողներն ամենավերջին վիրավորական արտահայտություններն անեն պատգամավորների հասցեին, հետո գան, այդ պատգամավորների հետ նորմալ հարցազրույցներ անեն, հետո նորից գնան այդ պատգամավորների հասցեին վիրավորական արտահայտություններ անեն»:
Հռիփսիմե ՋԵԲԵՋՅԱՆ
