«Չեմ կարծում, որ ձախողել ենք պատվաստման գործընթացը, չեմ էլ կարծում, որ հաջողված կարելի է համարել»,-այսօր կառավարության նիստից հետո, լրագրողների հարցերին՝ հաշվի առնելով վարչապետի դժգոհությունը, համարո՞ւմ է, որ պատվաստման արշավը առողջապահության նախարարության կողմից ձախողվել է, ի պատասխան ասաց առողջապահության նախարար Անահիտ Ավանեսյանը՝ մեկնաբանելով կառավարության այսօրվա նիստում վարչապետ Նիկոլ Փաշինյանի՝ պատվաստումների տեմպի վերաբերյալ դժգոհությունը:
«Առաջիկայում կտեսնենք՝ ինչ լրացուցիչ միջոցներ պետք է կիրառենք, որ գործընթացն արագանա»,-ասաց նախարարը՝ նշելով, որ վարչապետի դժգոհությունը տեղին էր. «Մենք պետք է անենք ամեն ինչ, որ պատվաստման ցուցանիշները հասցնենք մեր թիրախային կետերին: Օրենսդրական փոփոխությունները կատարված են, եւ առաջիկայում էլ կտեսնենք, թե ինչ լրացուցիչ միջոցներ պետք է կիրառենք, որ քաղաքացիները պատվաստման ընթացքին ավելի ակտիվ մասնակցեն: Հոկտեմբերի 1-ից արդեն իսկ ուժի մեջ է մտել սահմանափակումների որոշակի փաթեթ, եւ առաջիկայում էլ կտեսնենք՝ լրացուցիչ ինչպիսի միջոցներ պետք է կիրառենք, որ պատվաստումների գործընթացն արագանա»:
Նախարարից հետաքրքրվեցին՝ երբվանի՞ց են տեսչական մարմնի աշխատակիցները սկսելու այցելել տնտեսվարողներին՝ ստուգելու՝ պահպանվո՞ւմ են սահմանված կանոնները: Անահիտ Ավանեսյանը նշեց, որ տեսչական մարմնի փոխարեն չի կարող պատասխանել՝ վստահեցնելով, որ վարչական ռեսուրսները բավարար են՝ առավելագույնը հետեւելու համար տնտեսվարողներին:
Կարդացեք նաև
Նախարարը նաեւ նշեց, որ Հայաստանի բնակչության 14 տոկոսը ստացել է պատվաստանյութի առաջին դեղաչափը, իսկ եվրոպական, արաբական մի շարք երկրներում արդեն 90 տոկոսից ավելի պատվաստում են իրականացրել:
Հարցին՝ ե՞րբ հասանելի կլինի «Մոդերնա» պատվաստանյութը, Անահիտ Ավանեսյանը պատասխանեց, որ սկսվել է բաշխման գործընթացը, եւ վաղվանից ամբուլատորիաներում, պոլիկլինիկաներում պատվաստանյութն առկա կլինի. «50 000 դեղաչափը 25000 հոգու համար է, եւ բաշխումն այդպես էլ իրականացրել ենք: Ով կստանա առաջին դեղաչափը, կունենա երկրորդի հնարավորությունը»:
Լուսինե ԲՈՒԴԱՂՅԱՆ
